Gipaubos sa unom ka buwan nga preventive suspension si Gobernador Gwendolyn Garcia sa Office of the Ombudsman nunot sa iyang pagluwat og special permit sa usa ka desilting activity sa usa ka protected area dihang ang Sugbo nakasinati og El Niño phenomenon sa 2024.
Niadtong Martes, Abril 29, 2025, ang gobernador nibutyag nga iyang kwestyunon ang mando pagsuspenso kaniya nga gihulagway niyang ilegal.
Gitumbok niya ang provision sa Omnibus Election Code nga nagdili sa pagsuspenso ni bisan kinsang elective officials atol sa election period nga walay pag-aprobar sa Commission on Elections (Comelec).
Nidugang si Garcia nga gihikawan siya sa due process tungod kay wala siya pahibaw-a nga dunay nireklamo batok kaniya ug wala siya hatagi og higayon nga makatubag sa wala pa ipatuman ang suspension.
“No Comelec approval was secured prior to the issuance of this suspension,” matod niya.
Ang election period nagsu-god sa Enero 12 ug motapos sa Hunyo 11, 2025.
“The suspension order was…released with barely two weeks before the elections,” matod ni Garcia nga nagpapili alang sa iyang ikatulong sunod-sunod nga termino sa Mayo 12 nga midterm elections.
Gitataw ni Garcia nga giandam na sa iyang mga abogado ang sunod nga mga lakang aron kwestyunon ang suspension.
Ang Ombudsman sa iyang bahin nitataw nga ang kamanduan “immediately executory,” ug ang gobernador suspensuhon nga walay suweldo samtang gihusay ang reklamo.
Kini maoy ikaduhang preventive suspension nga gipahamtang batok ni Garcia.
Niadtong Disyembre 2012, ang Office of the President nisuspenso sab kaniya og unom ka buwan tungod sa grave abuse of authority nga reklamo nga gipasaka ni anhing Vice Governor Gregorio Sanchez.
Nioadtong higayona, si Garcia niinsister nga wala siyay nahimo nga sayon ug ang pagsuspenso kaniya usa ka politically motivated aron paghatag og dalan sa kandidato sa administrasyon pagka gobernador sa 2013 midterm elections.
Reklamo
Ang preventive suspension order, gipagawas niadtong Martes, Abril 29, tungod sa administrative complaint nga nagpasangil sa gobernador nga nakahimo og grave abuse of authority, gross misconduct, serious dishonesty, gross negligence, conduct prejudicial to the best interest of the service, ug kalapasan sa Republic Act 6713, o Code of Conduct of Ethical Standards for Public Officials and Employees.
Si Garcia niisyu og Special Permit 2024-09 niadtong Mayo 14, 2024, nga nagtugot sa Shalom Construction Inc. paghimo og desilting activities sa Mananga River sa Dakbayan sa Talisay ug Lusaran River sa Cebu City.
Ang duha ka sapa kabahin sa Central Cebu Protected Landscape.
Ang reklamante nangangkon nga ang permit gihatag bisan walay environmental compliance certificate o certificate of non-coverage gikan sa Department of Environment and Natural Resources (DENR), o pagkonsulta sa ubang ahensiya.
Krisis sa tubig
Gipasabot ni Garcia nga ang permit nahatag aron pagtubag sa El Niño phenomenon-induced water crisis nga grabeng nakaapektar sa Metropolitan Cebu Water District franchise area. Gikan sa Hulyo 2023 ngadto sa Hunyo 2024, ang Pilipinas nakasinati og El Niño phenomenon nga niresulta sa kadaot sa mga umahan ug pagnihit sa tubig.
“This action was taken purely out of urgency to alleviate a dire water shortage,” matod sa gobernador.
Iyang gidugang nga ang desilting gihimo uban sa pakigtambayayong sa duha ka Siyudad ang Sugbo ug Talisay uban sa DENR, Environmental Management Bureau, ug sa Mines and Geosciences Bureau.
Matod ni Garcia nga gisuportahan ang iyang desisyon sa Cebu Provincial Board pinaagi sa pagdiklarar sa state of calamity.
“There was no personal interest or malice involved — only a deep sense of responsibility to act swiftly in the face of the growing burden and suffering of the Cebuanos due to the dwindling water supply, not to mention the potential health hazards caused by the unavailability of clean water,” matod niya.
Sa iyang pamahayag, ang gobernador niingon nga ang reklamante nga si Moises Garcia Deiparine, maoy founder sa Duterte Riders Team ug “is openly affiliated with partisan political groups.” Iyang gidugang nga si Ombudsman Samuel Martires nga maoy nipirma sa kamanduan niadtong Abril 23, appointee ni kanhi President Rodrigo Duterte.
“It is important to note that the complainant is a known political figure affiliated with partisan groups. We will allow the facts — not political motivations — to speak for themselves,” matod ni Garcia. / dugang taho ni ANV