Sa kabalaka nga basin siya buwagan sa iyang kapuyo nga maoy nagbuhi kaniya, ang pagpangawat maoy solusyon nga ibuhi sa iyang kaugalingon sa higayon nga siya biyaan ug mag-inusara.
Apan gikaluhaan og malas ang 28 anyos nga ulitawo nga si Kyle Aganan, lumad sa lalawigan sa Masbate apan taodtaod nang nanimuyo sa Barangay Tabunok, Talisay City, kay siya nadakpan sa mga guwardiya sa usa ka dako nga mall sa South Road Properties (SRP) sa Cebu City.
Si Aganan nasikop niadtong Dominggo, Agusto 4, human nibiktima sa usa ka mall goer nga dalaga.
Base sa imbestigasyon sa Mambaling Police Station nga naaktuhan sa mall guard si Aganan nga nikuot sa duha ka mobile phones sa 24 anyos nga biktima nga diha sud sa bag nga igo lang gibutang sa lamesa.
Ang biktima giila nga si Mary Alob, taga Barangay Maghaway, Talisay City, kinsa wa nakabantay nga gikuot ang iyang iPhone ug Android phone nga gibana-bana nga mokantidad ngadto sa P50,000.
Si Aganan nadakpan sa civilian security guard nga si Jason Tapdasan, ug mga kauban niyang gwardiya.
Gi-turn over sa mall guards ang suspek ngadto sa Mambaling Police Station ug gikatakda nga karong adlawa, Agusto 7 pasakaan og kasong pagpangawat .
NAGPABUHI RA
Si Aganan nga nahinabi sa Superbalita Cebu niangkon sa iyang nahimo.
Asoy pa niya nga wa siya’y trabaho ug igo lang gibuhi sa iyang kapuyo, ug giingong nagpunay sila og away tungod kay wa siya’y kinitaan nga makaabag sa ilang pamuyo.
Naghuna-huna siya nga sa higayon siya hingpit nang biyaan wa nay mobuhi niya ug aron di siya magutman gikinahanglan nga mangandam ug magpundo siya og kuwarta nga iyang magamit og gasto.
“Na-isipan ko na ito ang ‘easy way’ na kumita ng pera. Akala ko kasi iiwan na niya ako kaya ako nagnakaw para may pera,” dugang ni Aganan.
Sumala pa nga naburyong siya sa kanunay nilang away sa iyang kaipon hinungdan nga siya nakahuna-huna nga mangawat.
Base sa pangangkon sa suspek nga sud pa lang sa duha ka higayon siya nga nangawat sud sa mall, diin una niyang gihimo niadtong miaging semana.
Nikita siya og P8,000 human nakakawat og upat ka gadgets, lakip na ang tablet niadtong higayona. Ang iyang mga kinawat iya ra sab nga gibaligya sa may Dalan Sanciangko, Cebu City ingon man sud sa mall sa maong dapit.
ALIBI LANG
Si Police Lieutenant Revy Dean Basalan, deputy chief sa Mambaling Police Station, nibutyag nga dili su’d lang sa makaduha ka higayon nakabiktima si Aganan.
Daghan na kini og nabiktima diin moigo siya su’d sa mall kay makalingla sa mga tawo kay magsul-ob og tarong sinina o magpa-chuy choy og porma nga daw mora ra sab og mall goer.
Nasayran nga gi-monitor na sa mga mall guard ang mga lihok ni Aganan, ilabi na nga ubay-ubay na ang mga reklamante sa kawat su’d sa mall.
Sa dihang ilang gisubay ang kuha sa ilang CCTV camera, nasigpatan si Aganan nga nikawat og mga butang sa mga mall goer sa higayon nga malipat.
Apan niadtong Agusto 4, 2024, nibalik ang suspek ug gibantayan na sa mga guwardiya ang iyang lihok ug wa sila masipyat tungod kay ilang naaktuhan nga mi-strike na pud kini.
Gihulagway nga nag-solo ra ang suspek nga mohimo’g operasyon.
Tungod sa iyang pagkasikop, ang Mambaling Police Station nanawagan ngadto sa mga biktima sa tiempo o kawat sa pagduaw sa ilang buhatan kon ilang namay-ungan ang suspek alang sa dugang kaso nga isang-at batok niini. / GPL