Usa ka manghihilot naposasan human gireklamo nga 'nangawat' sa alahas sa iyang gihilot, ala 1:30 sa hapon, Dominggo, Septiyembre 1, 2024, sa Purok 13, Brgy. Sabang, lungsod sa Sibonga.
Si Alice (di tinuod ngan), 44, minyo ug taga Brgy. Sangat, lungsod sa San Fernando, nadakpan sa hot pursuit sa kapulisan.
Naposasan si Alice sa Sibonga Police Station samtang nakasakay na sa bus sa terminal sa Brgy. Poblacion, Sibonga.
Usa ka Ciriaka (di tinuod ngan), 67, dalaga, negosyante, ug taga Purok 13, Brgy. Sabang, Sibonga, nangayo'g pakitabang sa kapulisan human giingong gikawatan sa manghihilot sa iyang kwintas nga may pendant nga mobalor og P50 mil.
Si Police Chief Master Sgt. Michele Ponce, imbestigador sa Sibonga Police Station nga nahinabi sa Superbalita Cebu, niingon nga ang suspek na-bot sa ilang lugar ug nagpaila nga usa ka Joan, nagsul-ob sa camouflage shorts nga naka-red sweatshirt.
Nangangkon kini nga staff member ni Fr. Silva sa dakbayan sa Carcar City.
Ang suspek mipadayag makaayo siyag mga balatian pinaagi sa massage ug faith healing.
Sumala ni Ponce, ang manghihilot maayo manabi ug nadala ang biktima.
"Mura daw siya'g na-hypnotized maayo kaayong manulti! Lagi kay manambal man, nadala siya (ug) nagpahilot," dugang ni Ponce.
Gisulti-an siya sa suspek nga mas maayo adto sila sa iyang kwarto paghilot.
Sanglit gusto niya nga manghilot sa dapit nga dunay santos o altar.
Nisugot ang biktima apan ang suspek midemanda nga hubo-on iyang kwintas.
Gihubo sa biktima iyang kwintas nga dunay pendant ug gibutang niya sa atubangan sa television.
Human sa paghilot, gilipat-lipat siya'g estorya sa suspek hangtud nga nakuha ang kwintas ug nagdali pagbiya.
Ang biktima dihang nakabantay nga nahanaw ang kwintas, daling nangayo'g panabang sa kapulisan.
Gisubay nila asa paingon hangtud nakit-an sa terminal bus.
Positibong gitudlo sa biktima ang suspek nga maoy niadto sa iyang panimalay.
Gisusi sa mga polis ug nakita sa posisyon sa pitaka ang Chinese gold necklace. / GPL