Nabalhug sa temporary custodial facility ang batan-ong lalaki nga nag viral sa social media nga manakay sa publiko nga mga sakyanan ug mopakita sa iyang abilidad sa pagkanta apan kon dili mahatagan og sinsilyo, manapat sa mga babayeng pasahero nga iyang hingian.
Si Arbie Flores Cuervo, 18, taga Sitio Bato, Barangay Ermita, dakbayan sa Sugbo gialarma nga armado sa mga tawo sa Dalan Leon Kilat, Brgy. Kalubihan, ala 1:15 sa Dominggo sa kaadlawon Marso 10, 2024.
Matod ni Police Lt. Colonel Janette Rafter, deputy city director for operations sa Cebu City Police Office, daling gipahibawo ang mga polis nga nag beat patrol sa dapit nga tungod niini, gipahibawo dayon ang ilang kampo sa CCPO.
Naatol usab nga dunay lakaw ang mga sakop sa City Intelligence Unit duol sa Dalan Leon Kilat, ila kining girespondihan.
Ilang naabtan ang suspek nga dunay giluklok sa hawak niini nga kalibre .38 nga revolver ug tulo ka mga bala.
“Gi-report ni siya sa mga police patrollers nga naatol nga naa sa duol, mao to gi alarmahan siya. Nya naa raman sad sa duol ang taga Intelligence Unit mao na ang nitubag sa alarma,” matod ni Rafter.
Giangkon ni Rafter nga human nag-viral ang video ni Cuervo, nimando gilayon si Police Colonel Ireneo Dalogdog, hepe sa kapulisan sa dakbayan sa Sugbo, sa pagpangita sa suspek sanglit daghan na ang reklamo nga ilang nadawat.
Apan nag-usab kini og rota, kaniadto didto siya sa publiko nga mga sakyanan nga magbiyahian sa south, apan nibalhin sa norte mao nga wa na makit-i.
Giangkon ni Cuervo nga nag dala-dala na siya og armas human nag viral ang iyang video tungod kay depensa niya sa kaugalingon tungod sa nadawat na niya nga hulga sa kinabuhi.
“Kanang akong armas pang depensa nako na sa akong kaugalingon kay na trending naman ko sa Facebook gud, kay naa kunoy mopatay nako. Mao to ako tong gidala ang armas sa akong amigo,” matod ni Cuervo.
Duna, matod pa, siyay gipangayuan sa Leon Kilat apan gipasanginlan siya nga snatcher hinungdan nga iya ning gihulga ug gipakita ang iyang armas nga giluklok sa iyang hawak.
Gipasabot usab niya nganong masuko siya kon dili mahatagan og sinsilyo.
Matod niya nga tungod kini sa kagutom ug dili na niya mabantayan ang iyang kaugalingon.
Subay niini, nangayo siya og pasaylo sa mga tawo nga iyang nadapatan dungan sa panghinaot nga dili na magdumot kaniya tungod kay nadakpan naman siya sa kapulisan.
Gipakita pa niya ang iyang talento sa pagkanta ug pag-arte nga iyang buhaton kon manaygon siya sa sulod sa mga publiko nga sakyanan.
Gibutyag ni Cuervo nga wala na siyay ginikanan sanglit ang iyang amahan ug inahan pulos nangabilanggo sa kaso sa ilegal nga drugas. /