Gidakop ang 24 anyos nga dalaga kay na wanted human nalutsan og warrant of arrest kay gikiha sa iyang maguwang gumikan sa giingong pagpakauwaw kaniya sa social media posts.
Si Dawn Cabredas Jagdon, taga Purok Santan, Brgy. Vito, Minglanilla, napusasan alas 7:50 sa buntag sa Lunes, Enero 15, 2024 sa Brgy. Lamacan, sa Sibonga sa tulo ka mga kaso nga
cyber libel. Nakapyansa siya sa Martes sa hapon ug nakagawas.
Ang Sibonga Police Station personnel nisikop kang Jagdon, pinasikad sa warrant of arrest nga giisyu ni Judge Glenda Ching Go, sa Branch 65 sa Regional Trial Court sa Talisay City, Cebu nga gipitsahan og December 19, 2023.
Ang korte nitugot sa akusado nga makapyansa og tag P10,000 sa matag usa sa tulo kaso.
Sa nakuha’ng impormasyon sa Superbalita Cebu, ang maguwang nikiha sa iyang manghod tungod sa giingong mga bastos, libelous posts nga giingon nga pagpanaut. Wala na makaaguwanta ang maguwang, nipasaka og kaso batok sa manghod.
Sa nakuhang impormasyon sa Superbalita Cebu, selos ang giingong motibo sa posts sa manghod sa social media.
Si Police Staff Sgt. Leon Gesim sa Sibonga Police station niingon nga nipiyansa si Jagdon sa tulo ka mga kaso Martes sa hapon, Enero 16, busa gibuhian ra usab dayon siya.