Patay ang maguwang human giunay og pusil sa manghod sa dihang wala magkasinabot sa instruction sa pag-ihaw sa bihag nga gitatari.
Ang insedente nahitabo sa alas 4:00 sa hapon Domingo, Hulyo 27, 2025, sa Purok Nangka, Sitio Greenhills, Barangay Lindogon, Lungsod sa Sibonga.
Ang biktima giila nga si Rechel Avila Dela Cruz, 36, poultry caretaker, taga Purok Nangka, Sitio Green hills sa maong barangay.
Base sa imbestigasyon sa kapulisan, ang biktima nanari sa Simala cockpit ug daugan apan namatay ra sab ang iyang manok igtatari.
Si Rechel nipauli sa ilang balay dala ang duha ka patay nga manok lakip na ang bihag.
Pag-abot sa ilang balay, gisugo niya ang iyang manghod nga si Felix, 34, ulitawo nga limpiyuhan ang mga manok aron nga lutuon.
Gituman ni Felix apan wala magdugay, niabot ang kapuyo sa iyang maguwang ug nipahibalo nga kuhaon niya ang mga manok sigon sa sugo ni Rechel.
Pipila ka minutos naabot si Rechel nga gihulagway nga hubog ug nagkalalis sa iyang manghod hinungdan nga nahitabo ang komusyon.
Niuwang pa ang ilang amahan nga si Rogelio Dela Cruz, 77.
Ang maguwang nga nagdala og atsa ang nigukod unta sa iyang manghod ug gisugat sa ilang amahan og gimaymayan nga mopauli na lang.
Samtang naglakaw ang biktima sa iyang pagpauli subay sa kasagbutan, gipusil kini sa manghod sulod sa tulo kahigayon.
Ang biktima gidali sa pagdala sa mga sakop Municipal Disaster Risk Reduction and Management Office (MDRRMO) Deiparene Community hospital apan namatay ra sab.
Ang suspek nadakpan sa kapulisan ug narekober ang usa ka unit .38 caliber revolver nga dunay tulo ka bala sa cylinder ug atsa sa crime scene.
Wa magkasinabot
Ang amahan nga si Rogelio, nagkanayon sa dihang nahinabi sa Superbalita Cebu nga nasumbagan sa maguwang ang iyang manghod.
Sigon pa sa suspek nga wala siya mahibalo nga dili isagol ang duha ka patay nga manok.
“Naa man gud ni siya’y regla nga dili mokaon sa iyang manok. Gusto niini, nga ibaligya lang samtang kadtong bihag mao ray lutuon,” saysay ni Rogelio.
Apan nasagol sa suspek sa dihang iya nang gihiwahiwa.
Tungod sa kalagot sa maguwang, iyang nadapatan ang iyang manghod.
“Wa man siya magsulti nga dili iapil pagluto. Nagtuo ko mga lutuon tanan ang manok, ako gisagol pagtagod,” sugilon sa suspek ngadto sa iyang amahan.
Matod pa nga napuno na ang manghod sa iyang maguwang nga manapat ilabi na kon mahubog.
Padayon pa nga nidesisyon ang pamilya kon mopasaka og kaso batok sa suspek. (GPL)