NAMATAY diha-diha ang manghud human gidunggab sa iyang maguwang nga giingong nasuko kay wa pahulama og lighter alas 6 sa gabii sa Dominggo, Pebrero 9, 2025 didto sa Sitio Cantisang, Brgy. Paril, bukirang bahin sa Dakbayan sa Sugbo.
Ang biktima gitago sa alyas nga Joen, 45, ulitawo, nakaangkon og samad dinunggaban sa wala nga bahin sa iyang dughan nga miresulta sa iyang kamatayon.
Samtang ang iyang maguwang nga si Cisoy, 50, minyo, pulos mga mag-uuma, napu-sasan sa kapulisan human sa krimen.
Hinuon, giangkon ni Cisoy ang iyang nahimo.
Sa imbestigasyon sa Talamban Police Station 8, nasayran nga ang maguwang ug ang manghod aduna nay dumot.
Atol sa maong hitabo, pulos mga nakainom ang duroha.
Matud pa sa suspek nga nahinabi sa mga tigbalita, nakalitan siya dihang mibisita iyang manghod kaniya.
Gani makadaghang higayon na siyang gi-atang-atangan niini.
Matud niya nga ang iyang manghud kinsa iyang gihulagway nga nagumon sa illegal nga drugas, nanghuwam kaniya og lighter kay gamiton sa pagpanabako.
Pero iya kining gibalibaran kay unsaon man sa biktima ang lighter nga wa man siyay sigarilyo.
Tungod niini nasuko ang biktima og nahitabo ang ilang panaglalis.
Gitambagan sa maguwang nga mopauli nalang apan wala kini mopatuo bisan pa man mitabang sa pagbadlong kaniya ang mga silingan.
Nagduda ang maguwang nga dunay dautang plano iyang manghod.
Nagtuo siyang adunay dala nga armas ang iyang manghod kay nagsul-ob kini og jacket.
Tungod niini giunhan sa suspek sa pagdunggab gamit ang kutsilyo.
Matud niya nga wala siyay plano nga patyon ang iyang manghod kun dili iya lang ki-ning samaran. Sumala pa nga grabe ang iyang pagmahay sa nahitabo.
“Napuno na gyud ko ana niya, gabii sige siyag ingun nako nga gawas diha, gawas diha mao to nagsige man siya og panghagad unya daan nako nga naay kalagot ana niya, karon kay ni sung siya nako unya gabii pa gyud mao to nagtuo ko nga naa siyay armas kay nag jacket man siya mikalit man siyag butho,” matud ni Narciso.
Naanad na matud pa si Cisoy nga permi siya sulngon sa suspetsado apan adlawan kini niya buhaton ug nakurat nalang siya nga gabii kini miadto sa iyang balay.
Kasong murder ang ipasaka sa Police Station 8 batok sa suspetsado. / DVG, GPL, AYB