Manghulga nga mamusil sa maningil, gironda

 Si Felix Charles Aliño Ramos (naghukas), 39, gibasahan sa search warrant.
Si Felix Charles Aliño Ramos (naghukas), 39, gibasahan sa search warrant. CIDG

Nasikop sa mga sakop sa Criminal Investigation and Detection Group Cebu City Field Unit ang usa ka lalaki nga gireklamo’ng kanunay manghulga sa mga collector sa usa ka motor company nga nagpautang sa Sitio Mahayahay, Barangay Calamba, dakbayan sa Sugbo, pinaagi sa pag-serve sa search warrant sa balay niini, diin dunay nakuha nga armas.

Ang suspek giila nga si Felix Charles Aliño Ramos, 39, lumolupyo sa maong lugar.

Ang CIDG Cebu City Field Unit sa pagpangulo ni Police Lieutenant Colonel Randy Korret nidala’g search warrant nga giluwatan sa korte batok kang Ramos.

Malampuson kini nga gi serve alas 6:14 hangtod alas 8:03 sa Martes sa buntag, Pebrero 13, 2024, nga niresulta sa pagkasakmit sa kalibre .45 nga armas ug mga bala niini, lakip na magazine.

Lakip sa nakuha ang usa ka pakete sa gituohang shabu ug drug paraphernalia.

Ang CIDG nakadawat og reklamo labot sa kanunay nga pagpanghulga sa suspek panahon nga dunay maningil nga collector sa usa ka motor company sa lugar ug kon mahubog usab.

Giingong nangahadlok na ang mga collector nga moadto sa maong lugar tungod kay nibahad kini nga iyang pamusilon.

Sa dihang nasuta nga tinuod ang pasangil atol sa imbestigasyon sa CIDG, giaplayan dayon nila kini og search warrant sa korte.

Gawas sa reklamo nga pagpanghulga, giingong nalambigit usab kini sa ilegal nga drugas.

Gani giila kini nga high value individual sa mga police station sa dakbayan sa Sugbo, ilabi na sa Sawang Calero Police Station.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph