‘Manglungkabay’ nasikop sa polis

Cebu City map.
Cebu City map.

Duha ka notadong mga manglungkabay nasikop sa gilusad nga follow- up operations sa mga sakop sa Parian Police Station sa pagpangulo sa hepe niini nga si Police Major Marvin Fegarido.

Kini human gitaho nga nanglungkab sa buhatan sa Archdiocesan Campus Ministry nga nahimutang sa dalan Pelaez, Barangay Kamagayan, dakbayan sa Sugbo.

Ang mga suspek giila nga silang Francis Jake Bunal Padayao, 27, taga V. Rama St., Barangay Calamba ug Anthony Pilapil, 27, taga Sitio Mahayahay, Barangay Calamba ning siyudad.

Niadtong Sabado, Abril 6, 2024 ang admin staff sa Archdiocesan Campus Ministry nipa-blotter sa Parian police station labot sa paglungkab sa ilang opisina niadtong Abril 4, 2024, diin ang door lock naguba na.

Sa pagsusi sa sulod, nawagtang na ang usa ka Carsell BT speaker nga dunay microphone, usa ka Monster BT speaker, usa computer monitor, usa ka guitar, duha ka camera tripod, 1 ka Megabox, usa ka bag nga dunay sulod nga nagkalainlaing wires/cords ug usa ka Oppo A71 cellular phone, mobalor ang tanan og P90,000.

Gisusi sa kapulisan ang kuha sa CCTV footage ug ilang nailhan sila si Pilapil ug Padayao.

Alas 5:30 sa Sabado sa hapon gilusad nila ang follow up operation nga niresulta sa pagkasikop sa duha ka mga suspek.

Nabawi sa mga polis ang gipangkawat sa mga suspek nga gikompirmar usab sa admin officer nga kini gipanag-iya sa Archdiocesan Campus Ministry. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph