Balik na sab sa bilangguan ang manglungkabay human nasakpan siya nga nanglugit og tubigan mga alas 3:00 sa kaadlawn, Hulyo 29, 2025, sa Barangay Kamagayan, Dakbayan sa Sugbo.
Nailhan ang dinakpan nga si Virgilio Sinco, 54, minyo, walay trabaho, residente sa Sitio Bato Carbon, Barangay Ermita.
Base sa imbestigasyon sa Parian Police, nasuta nga nigamit og ice pick ug screw driver si Sinco sa paglungkab sa maong tubigan og gikuha ang mga sinsiyo nga muabot og P300.
Apan wala siya makaikyas sanglit nasakpan sa tag-iya sa maong tubigan ug dali nga nakatawag sa kapulisan hinungdan nga malampuson nga nadakpan.
Giangkon sa suspek nga nabuhat niya ang salaod sanglit gigutom siya ug iyang ipalit og pagkaon sa iyang kaugalingon ug sa iyang pamilya.
Nangatarungan sab siya nga musulod unta siya'g bisag unsa nga trabaho apan walay modawat kaniya sanglit dili siya kahibalo mosuwat ug mobasa.
Gibalhog sa Parian Police Station si Sinco ug mag-atubang og tukmang kaso. (JDG)