Kadtong babaye sa nag-viral nga video sulod sa Basilica Minore del Santo Niño niadtong Septiyembre 2024, nga nanguot sa nag-ampo, nadakpan sa gilusad nga buy-bust sa Waterfront Police Station 3 sa Cebu City Police Office alas 11:55 sa gabii, Miyerkules, Enero 15, 2025, sa Sitio Laurente, Barangay Tejero sa Siyudad sa Sugbo.
Ang suspek giila nga si Elma Paraiso, alyas Emang, 63, taga Ermita Proper, Dakbayan sa Sugbo.
Nakuha sa mga operatiba sa Waterfront Police Station 3 ang mga pinakete sa gituohang shabu nga motimbang sa 5 gramos nga dunay standard drug price nga P34,000.00 nga gi-turnover sa Cebu City Forensic Unit alang sa chemical analysis.
Giangkon sa suspek nga iyaha ang maong ilegal nga drugas gani iyang gikalipay nga nadakpan sa mga polis kay gusto na siya nga magbag-o.
Matod niya nga dugay na siya nga gibadlong sa iyang mga anak nga moundang kay gikauwaw na siya niini sa dihang nag-viral iyang video nga nanguot sa usa ka babaye nga nisimba sa Santo Niño ug nakuha pa niya ang cellphone sa biktima.
Nipasabot siya nga napugos siya sa pagpaninda og shabu kay duna siyay apo nga giatiman nga dunay kakulian sa panglawas.
“Katong nag-viral akong video sa Santo Niño sauna ako man to, mao tong pwerting sukoa sa akong anak ato. Gikaulaw na ko nila kaayo, mao nang nalipay ko nga nadakpan na ko karon aron magbag-o na,” matod ni Emang. / AYB