Nadakpan sa security guard ang usa ka lalaki nga nasakpan nga mikuot sa pitaka sa usa ka kustomer sud sa usa ka mall sa Barangay Banilad, dakbayan sa Sugbo, niadtong Lunes sa hapon, Agusto 12.
Ang dinakpan gialyasan og Gapor, 38, taga Barangay Marigondon, dakbayan sa Lapu-Lapu gi-turnover sa mga sikyu sa mall ngadto sa Mabolo Police Station 4.
Ang biktima usa ka 27 anyos nga magtutudlo ug molupyo sa Barangay San Jose, siyudad sa Sugbo.
Base sa inisyal nga imbestigasyon sa kapulisan ang biktima nga gitago sa pangalan nga Mary Angel ang milinya ngadto sa counter aron mo-order og mainom samtang gibilin niya ang iyang shoulder bag sa lamisa apan iya kining gisigehan og lingi.
Nakita sa biktima ang suspek nga adunay gikuha sa iyang bag dayong dali nga mibiya.
Gidali og tan-aw ni Mary Angel og unsay nawala diha sa iyang bag ug iyang nasuta nga wa na ang iyang pitaka hinungdan nga dali siya nga nangayo og pakitabang sa security guard sa maong establisemento.
Nahitabo ang ginukdanay ug nadakpan si Gapor sa guwardiaya ingon man ang pagkabawi sa pitaka sa biktima nga adunay sud nga P1,400, credit card, ATM cards ug ubang importante nga dokumento.
Ang suspek gitanggong sa Mabolo Police Station ug gikatakdang pasakaan og tukmang kaso. / DVG