Padayon ang gihimong manhunt sa Probinsiya sa Basilan human duha ka sundalo ang patay ug usa ang samdan sa ambush niadtong Biyernes, Abril 11 sa Lungsos sa Tuburan.
Ang patay naila nga sila si Sgt. Reymark Bation ug Cpl. Jordan Daquipel sa 18th Infantry Battalion (18IB) nga gipusil patay samtang nagsakay sa motorsiklo sa Barangay Duga-a alas 4:20 sa hapon sa maong adlaw, kini matod sa tigpamaba sa Western Mindanao Command (Westmincom) Col. J-Jay Javines.
Si Cpl. Richivie Flores nakaangkon og samad pinusilan ug padayon nga nagpaalim karon sa Lamitan District Hospital.
Matod ni Javines nga ang mga sundalo gikan sa ilang patrol base sa Duga-a ug padulong sa 18IB Charlie Company command post dihang giatake sila.
Dali nga nakaikyas ang mga mamumuno.
Narekober sa mga awtoridad ang basiyo sa M-16 rifle.
Dugang ni Javines nga alerto na ang tanang checkpoints ug intelligence aron masikop ang mga nagpaluyo ning pagpang-ambush.
Ang ambush nahitabo kapin usa ka oras human ang pagpangatake sa Sitio Bohe Libi, Barangay Macalang, Al-Barka, Basilan, diin duha ka mangangahoy ang napatay samtang paingon sa ilang mga panimalay. / PNA