Mga duwa karon:
3:00 P.M Phoenix Super LPG Fuel Masters batok San Miguel Beermen
6:15 P.M Magnolia Chicken Timplados Hotshots batok Barangay Ginebra San Miguel
Ang rivalry sa Magnolia Chicken Timplados Hotshots ug Barangay Ginebra Gin Kings nga gitawag og Manila Clasico maoy mopainit sa adlaw sa basketball fans sa Philippine Basketball Association (PBA) Philippine Cup karong Dominggo, Marso 31, 2024, sa Smart Araneta Coliseum.
Gilauman nga modasok ang Ginebra ug Magnolia supporters karong Easter Sunday sa pagbalik sa liga human sa taas nga pahuway tungod sa PBA All-Star break ug Lenten Season.
Tinguha sa Hotshots nga inaton ang ilang standing ngadto sa 2-0 ug sundan ang impresibo nga 31 puntos nga dominasyon sa 2024 Philippine Cup debut game kontra Converge.
Itandi sa ilang unang tahas, mas bug-at hinuon nga hagit ang atubangan sa Magnolia nga gipangulohan nila ni Mark Barroca, Calvin Abueva, Ian Sangalang, Jio Jalalon ug Paul Lee.
Ang Ginebra nga gabitbit og 2-1 rekord di pud mayano karon nga torneyo sa pagpangulo nila ni Scottie Thompson, Stanley Pringle Jr., Christian Standhardinger, Japeth Aguilar ug Maverick Ahanmisi.
Tumong sa Ginebra nga makabawi human sila gipakirig sa Meralco Bolts, 73-91, niadtong Marso 15.
Samtang sa first game, iparada sa defending champion San Miguel Beermen ang ilang solido nga lineup sa tinguha nga masakmit ang ikatulo nga sunodsunod nga daog batok sa Phoenix Super LPG Fuel Masters.
Gikan ang Beermen sa kulbahinam nga kadaugan batok sa rival TNT Tropang Giga, 91-89, sa wa pa ang taas nga break niadtong Marso 17 sa Ynares Sports Center, Antipolo City.
Nisaka ang Beermen sa 2-0 ug sila na lang sa sister team Magnolia Chicken Timplados Hotshots (1-0) ang nagpabiling wa’y pilde sa Philippine Cup.
Ang seven-time MVP nga si June Mar Fajardo nitimon sa Beermen sa iyang double-double nga 15 puntos ug 17 ka rebounds. Si Fajardo nisulod sa duwa gikan sa bench nga panagsa ra nahitabo sa iyang pro career.
Lahi pud ang plano sa Fuelmasters (1-3) kay gusto niini nga makabalik sa win column human gipilde sa Rain or Shine, 85-100. / RSC