Temporaryong gidili ni Cebu Governor Gwendolyn Garcia ang pagpasulod sa mga buhing manok, gamefowls, wild birds, pigeons, pullets ug pet birds nga gikan sa probinsya sa Leyte sulod sa 45 ka adlaw aron malikayan ang pagsulod ug pagkatap sa Avian Infuenza sa probinsya sa Sugbo.
Kini maoy mando sa gobernador nga gipaagi sa Executive Order No. 6 S.2024 gumikan sa nakita’ng pagsaka sa gidaghanon sa mga manok nga nangamatay sa poultry farm sa Leyte sa Marso.
Gidudahan kini’ng mahimong hinungdan sa posibleng AI outbreaks sa mga silingang lugar.
Hinungdan nga niluwat og lagda ang Department of Agriculture nga naglatid sa guidelines nga kinahanglang sundon alang sa pagpagawas ug pagpasulod sa mga manok sa mga lokalidad.
Hinuon, dunay pipila ka mga poultry product nga gikinahanglan nga moagi sa makuti’ng proseso aron tugutan kini’ng makasulod sa Sugbo.
Subay niini, gimandoan ang tanang mga lokalidad lakip na ang kapulisan, pantalan, tugpahanan, ug barangay sa pagpatuman sa lagda. / ANV