Gipakita ni Vic Manuel nga naa pay nabilin sa iyang tangke ubos sa bag-ong team nga Terrafirma Dyip human kini gi-trade gikan sa powerhouse San Miguel Beermen.
Si Manuel miduwa sa unang higayon ubos sa Terrafirma sa Philippine Basketball Association (PBA) Commissioner’s Cup niadtong Sabado sa Ynares Sports Center sa Antipolo.
Ang beterano mibuhat og 23 puntos ug lima ka rebounds apan nasugamak gihapon sa kapildehan ang Terrafirma batok Northport, 113-101.
Mas taas ang playing time ni Manuel tungod kay napiang man ang Dyip import nga si Ryan Richards sa sayong bahin sa duwa.
Niangkon si Manuel nga wa pa siya sa saktong kundisyon ug gihangak pa siya, didto na siya nakabawi sa second half.
“As in wala pa sa kundisyon. Kaka-practice ko lang two days ago, and then game na ngayon," matod niini. “Tapos bigla wala pa kaming import. So mapipilitan ka talagang maglaro ng medyo mahabang minutes.”
Mapasalamaton hinuon si Manuel nga nahatagan siya og lain nga higayon ubos sa Terrafirma. / RSC