Manuel mobiya sa SMB?

SunStar Basketball
SunStar Basketball

Kondisyon ug himsog.

Mao kini ang paghulagway sa usa ka tinubdan sa Spin.ph kabahin sa estado sa panglawas ni San Miguel Beermen power forward Vic Manuel atol sa Philippine Basketball Association (PBA) Season 48 Philippine Cup finals series diin naghari ang Meralco Bolts, 4-2.

Ning maong series, grabe ka limitado ang oras ni Manuel sulod sa korte nga daw usa ka tanghaga alang sa uban.

Sa kinatibuk-an ning season-ending conference, sulod lang sa walo ka mga duwa nakapakita og aksyon ang 12 ka mga tuig nga beterano unya limitado pa gyud ang iyang playing time.

Sa nag-unang tulo ka mga duwa sa finals series, nagpasinaw ra sa bangko si Manuel.

Sa Game 4, surpresang gipaduwa ni coach Jorge Gallent si Manuel unya nakatampo kini og walo ka mga puntos sulod lang sa pito ka mga minutos nga pagduwa.

Ning maong duwa, ningdaug ang Beermen, 111-101, nga maoy nakatabla sa best-of-seven series, 2-2.

Apan sa nagsunod nga duha ka mga duwa, napapha na sab si Manuel sa rotasyon sa Beermen.

Kay ngano kaha?

Nagkanayon si Gallent nga adunay sakit si Manuel, gani nakapalta kini sa ilang mga praktis sa wala pa nagsugod ang finals.

Apan gitin-aw sa tinubdan nga wala’y sakit ug wala’y angol si Manuel niadtong higayuna.

“Walang injury yun. Di lang nagagamit,” pasabot sa tinubdan nga napatik sa Spin.ph.

Nilawom ang misteryo kabahin sa estado ni Manuel human adunay mga post sa social media human sa Game 4 nga nagpasumbingay sa dili maayong relasyon sa gitawag og “Muscle Man” sa coaching staff.

Wala makompirmar kon si Manuel ba ang nag-post niini.

Aduna sab laing post nga gipasalamatan ni Manuel ang Beermen ug aduna kini lakip nga hulagway nga makita ang masalub-ong mga magduduwa sa Beermen.

“Thank you SMB!!! #MyChildHoodTeam,” mensahe sa maong post.

Ang kontrata ni Manuel sa Beermen mahuman na karong Abril sa sunod tuig ug gikatahapan nga posibleng mobalhin sa laing team si Manuel.

Hinuon, kining tanan pulos pa lang katahap. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph