Nabalhug sa Mabolo Police Station ang usa ka lalaki nga naatlan sa mga barangay tanod sa Busay, dakbayan sa Sugbo nga nanuyop og gasolina sa nag-park nga mga sakyanan sa Sitio Plaza Housing alas 2:45 sa kaadlawon, Biyernes, Enero 26, 2024.
Ang suspek giila nga si Christian Manano, 28, taga Golden Valley, Barangay Lahug, dakbayan sa Sugbo.
Sa imbestigasyon sa Mabolo Police Station sa pagpangulo ni Police Major Romeo Caacoy nga naatlan sa mga residente ang suspek nga nagpasuyop sa gasolina sa duha ka multicab nga gi-park sa kilid sa karsada.
Daling nanawag og barangay tanod ang residente ug naabtan gyud nga nag-ungot pa ang hose sa tangke sa multicab paingon sa galon nga maoy gisudlan sa gasolina.
Gidala siya sa barangay hall sa Busay pinaagi nila ni konsehal Kevin Sanchez ug mga barangay tanod nga sila si Jimmy Magno, Edgar Gabud, Dennis Abrigana ug Ranillo Abrigana nga maoy nagsilbing arresting officers.
Giingong notado na nga manuyopay og gasolina ang suspek sa dapit. Gani daghan na ang reklamo sa mga nanag-iya og sakyanan nga naka-park lang sa kilid sa karsada nga inay full tank sa gasolina ang ilang sakyanan, pagka ugma empty na bisan wala gamita.
Kasong pagpangawat ang ipasaka sa Mabolo Police Station batok sa suspek.