Mobalik sa professional ranks ang Olympic bronze medalist nga si Eumir Marcial aron harongon si Omar Ulises Huerta sa usa ka 10-rounder nga bakbakan karong Septiyembre 19, 2026, didto sa Pechanga Arena sa San Diego, California, USA.
Miaging 10 ka bulan ang nakalabay sukad sa katapusang pro fight sa 30-anyos nga si Marcial. Ang iyang ulahing sangka nahitabo niadtong Oktubre 29, 2025, diin nidaog siya pinaag I sa majority decision batok Eddy Colmenares aron sakmiton ang bakanteng World Boxing Council (WBC) International middleweight belt didto sa Quezon City.
Duha ka bulan human sa maong sangka, nibalik si Marcial sa amateur level aron modula sa 33rd Southeast Asian (SEA) Games. Gipamatud-an niya ang iyang kalibre dihang iyang gipildi si Maikhel Muskita sa Indonesia aron sakmiton ang gold medal didto sa Thailand.
Sa pikas bahin, ang 30-anyos usab nga si Huerta usa ka 17-fight veteran nga bag-o lang nakigbatok alang sa tulo ka regional belts sa iyang miaging sangka.
Nakatilaw si Huerta og unanimous decision loss batok ni Vito Mielnicki Jr. alang sa International Boxing Federation (IBF) USBA, WBC Continental Americas, ug World Boxing Organization (WBO) Global middleweight titles niadtong Abril 11, 2026, didto sa New Jersey.
Si Marcial nagbitbit og limpyong 7-0 record nga may upat ka knockouts, samtang si Huerta adunay 15-1-1 slate lakip ang 13 ka panagpildi pinaagi sa KO. / EKA
