Daw dili mag-apil-apil si Presidente Ferdinand “Bongbong” Marcos Jr. kabahin sa preventive suspension nga giisyu sa Office of the Ombudsman batok ni Cebu Governor Gwendolyn “Gwen” Garcia.
Sa usa ka press conference, si Palace Press Officer Undersecretary Claire Castro nagkanayon nga gusto sa presidente nga ipatigbabaw ang lagda sa balaod.
"Hindi po gagawin ng Pangulo ‘yan (mangialam)," matod ni Castro.
"Ang pananaw po ng Pangulo ay laging kung ano ang dapat sa batas, hindi po natin gagamitin iyong excuse ng pamumulitika. Maaari siguro na may mga issues patungkol sa pamumulitika, but still ang Pangulo, ang gusto lamang po niya ay masunod kung ano ang sinasabi ng batas," dugang niini.
Sa usa ka pamahayag Huwebes, Mayo 1, si Marcos miingon nga si Garcia angayan nga trataron nga patas ug may pagtahod hangtod nga masulbad ang tanang legal nga mga pangutana bahin sa iyang pagkasuspenso.
Ang Presidente nagkanayon nga ang bisan unsang aksyon nga makaapekto sa mandato sa usa ka pinili nga opisyal kinahanglang moagi sa saktong mga agianan ug subay sa Konstitusyon ug sa Omnibus Election Code, ilabi na nga ang preventive suspension order giisyu sulod sa election period.
Ang suspensyon gumikan sa mga kaso nga gipasaka kalabot sa pag-isyu ni Garcia og special permit alang sa desilting activities sa Mananga River sa Talisay City, usa ka protected area, atol sa El Niño phenomenon niadtong 2024 nga walay saktong environmental clearance.
Iyang namatikdan nga ang reklamante kauban sa usa ka partisan political group, ang Duterte Riders Group sa Sugbo, kinsa mga tigpaluyo ni kanhi Presidente Rodrigo Duterte.
Si Garcia niingon nga magpabilin siya sa katungdanan, niingon nga walay legal nga basehan ang preventive suspension.