Gibutyag ni Presidente Ferdinand “Bongbong” Marcos Jr. nga mas gipili niya nga igahin ang iyang oras ug kusog sa pagtubag sa dinalian nga mga isyu sa nasod ug sa pagpalambo sa kinabuhi sa mga Pinoy, imbes nga maglambigit sa nagpadayon nga proseso sa impeachment batok kang Bise Presidente Sara Duterte.
Sa ikaduhang yugto sa BBM Podcast nga gisibya niadtong Sabado, Hunyo 21, 2025, gipasiugda ni Marcos nga ang executive branch walay papel sa proseso sa impeachment, nga hingpit nga gidumala sa lehislatura.
“Siguro if a president chooses to do that; I choose not to,” matod ni Marcos.
Gisubli niya nga ang mga butang labot sa impeachment maoy bugtong responsibilidad sa Kongreso ug sa Senado.
“Lahat ng impeachment process nasa lehislatura ‘yan. It’s between Congress and the Senate,” matod ni Marcos.
Giklaro sa Presidente nga ang iyang kasamtangang prayoridad anaa sa agenda sa kalambuan sa gobyerno, ilabi na sa mga sektor nga direkta nga nakaapekto sa katawhan.
“I’m busy with the transport, with the rice, with all of the different things that we are doing that nauubos ang oras ko doon. Wala naman akong papel doon sa impeachment,” matod ni Marcos.
Niadtong Hunyo 11, gipamatud-an sa House of Representatives nga ang mga reklamo sa impeachment batok kang Duterte nasubay sa 1987 Constitution.
Kini human gibalik sa Senado ang mga artikulo sa impeachment, nga nangita og katin-awan sa proseso sa dili pa mopadayon sa paghusay.
Gipahiluna sa Balay Balauranan ang Resolution No. 2346, nga nagpamatuod nga ang impeachment proceedings nga gisugdan niadtong Pebrero 5, 2025, nagsunod sa konstitusyonal nga mga kinahanglanon ubos sa Artikulo XI, Seksyon 3, lakip na ang pagdumala sa daghang mga reklamo nga gipasaka sulod sa usa ka tuig.
Ang resolusyon gihimo nila ni Senior Deputy Speaker Aurelio Gonzales Jr., Deputy Speaker David Suarez, ug Majority Leader Manuel Jose Dalipe.
Si House Speaker Martin Romualdez, kinsa maoy nangulo sa sesyon, mipadayag og kabalaka sa desisyon sa Senado sa pagbalik sa mga artikulo apan gipasiugda nga ang Balay Balauranan nagbarog sa iyang konstitusyonal nga katungdanan.
Gihangyo sa Senado ang Balay Balauranan nga klaruhon nga ang probisyon sa konstitusyon nga naglimita sa impeachment proceedings sa kausa matag tuig matag opisyal wala malapas, ug pormal nga kumpirmahon ang pagkaandam niini sa paggukod sa reklamo.
Kapin sa 250 ka mga miyembro sa Balay Balauranan ang miuyon sa mga artikulo sa impeachment niadtong Pebrero, sa wala pa mag-adjourn ang Kongreso alang sa eleksyon sa Mayo 2025.