GIMANDUAN ni Presidente Ferdinand Marcos Jr. ang mga ahensiya nga pakusgan ang mga operasyon taliwala sa taho nga nisaka ang pagpayuhot sa mga produkto sa agrikultura nga iyang gihulagway nga hulga sa nasudnong seguridad.
Sa usa ka pahayag niadtong Martes, Hulyo 15, 2025, si Department of Agriculture (DA) Secretary Francisco Laurel Tiu niingon nga namatikdan ni Marcos nga kining ilegal nga patigayon nagdaot sa panginabuhian sa mga mag-uuma, nagbungkag sa merkado, ug naghatag og piligro sa panglawas sa publiko ug seguridad sa pagkaon.
Matod ni Tiu nga nakigtagbo siya sa bag-ong gitudlo nga Bureau of Customs Commissioner Ariel Nepomuceno, National Security Adviser Secretary Eduardo Año, Philippine National Police Chief General Nicolas Torre III, ug mga representante gikan sa Criminal Investigation and Detection Group (CIDG) aron maghimo og mga estratehiya sa pagtarget sa mga sindikato sa pagpayuhot.
Iyang giingon nga giisip sa gobiyerno ang pagsaka sa pagpayuhot isip usa ka kritikal nga isyu sa nasudnong seguridad, ilabi na kay ang mga wala mainspeksyon nga produkto sa agrikultura maghatag og dakong risgo sa biosecurity sa mga industriya sa tanom ug kahayupan sa nasod.
“The President has directed the DA to throw the book at the consignees and all those involved in smuggling these agricultural products. By the end of the year, we hope to see many of those responsible handcuffed, facing charges,” pulong si Tiu.
“President Marcos is especially concerned about the damage these market disruptive practices cause to local farmers, fisherfolk, and legitimate businesses. This not only harms the economy but fosters corruption at multiple levels,” dugang niya.
Gihatagan sab og gibug-aton ni Laurel nga ang mga customs broker mag-atubang usab og legal nga sangputanan isip kabahin sa mga paningkamot sa pagpatuman sa Anti-Agricultural Economic Sabotage Law, Food Safety Act, ug Customs Code.
Iyang giingon nga ang mga imported goods kasagaran gikan sa Port of Xiamen, China, ubos na karon sa gipalig-on nga pag-monitor tungod kay kadaghanan sa mga gipayuhot nga baligya gikan sa Chinese port. / TPM / SunStar Philippines