Sa iyang mensahe alang sa Labor Day 2025, gipasaligan ni President Ferdinand “Bongbong” Marcos Jr., ang trabahanteng mga Pilipino nga ang suporta sa gobiyerno dili lang usa ka katungdanan kon dili usa sab ka tinud-anay nga pagpasalamat ug pag-ila sa ilang mga sakripisyo.
“Taimtim ang aming paninindigang kayo ay hindi pababayaan, bagkus ay higit pang itataguyod—hindi bilang tungkulin lamang, kung hindi bilang pasasalamat at pagkilala sa inyong tunay na halaga at sakripisyo,” matod ni Marcos sa iyang mensahe niadtong Huwebes, Mayo 1, 2025.
Gihatagan og gibug-aton ni Marcos ang pagkamahinungdanon sa papel sa mga trabahante kabahin sa pag-umol sa kaugmaon sa nasod.
“Ang paggawa ay hindi lamang pag-aangat sa sarili, kung hindi dakilang ambag sa kasaysayan ng ating bansa,” dugang niya.
Giklaro sa presidente nga ang Labor Day dili lang kutob sa simbolikong kalihukan, kon dili usa ka panawagan alang sa tinuod nga reporma ug mga palisiya nga motubag sa mga panginahanglan sa mga trabahante, magpanalipod sa ilang mga katungod, ug moseguro sa matinud-anong kahimtang sa trabaho.
“Nararapat lamang na ang pagdiriwang na ito ay gawin nating pagkakataon upang bumuo ng mga kongkretong hakbang upang matugunan ang mga pangangailangan ng bawat pamilya, matiyak ang kaligtasan sa lugar ng trabaho, at mapangalagaan ang karapatang makamit ang magandang kinabukasan,” batbat ni Marcos. / JGS / SunStar Philippines