Hugot nga siguridad ang ipatuman sa kapulisan sa Dakbayan sa Sugbo sa Cebu City Sports Center ug sa nakapalibot niini atol sa opening salvo sa Palarong Pambansa sa Hulyo 9, 2024 subay sa pagtambong ni Presidente Ferdinand Marcos Jr., uban kang Bise Presidente Sara Duterte.
Matod ni Police Lieutenant Col. Janette Rafter, deputy city director for administration sa Cebu City Police Office (CCPO), nga ang ilang tahas mao ang area ug route security sa Presidente samtang ang naa sa sulod mao na ang Presidential Security Group (PSG).
Gilauman nga subsub ang pagsusi sa venue sama sa paneling sa sniffing dogs ug paghiling sa mga gamit sa mga mosaksi sa pagbukas sa Palarong Pambansa.
“Kon unsa ang atong giandam nga personnel nga mobantay sa gawas sa venue, mao na usab na sila ang magsilbing security sa pagbisita sa atong President ug Vice President,” matod ni Rafter.
Gawas niini, nag-andam usab sila og usa ka team sa Civil Disturbance Management (CDM) kon dunay molusad og lihok protesta sa militante nga mga pundok.
Tugotan sila nga makahimo og programa, apan dili sila makapaduol sa venue diin naa didto ilusad ang programa sa Palaro.
MAXIMUM TOLERANCE
Sama sa naandan, maximum tolerance ang ipatuman sa kapulisan sa mga progresibong grupo dungan sa awhag nga motuman lang sa balaod.
Sa Hunyo 30, 2024 pa lang naka full alert na ang Police Regional Office (PRO 7) diin tanang police personnel gimandoan nga naka standby sa ilang tagsa-tagsa ka police station.
Way nadawat nga hulga ang kapulisan labot sa pagtambong nila ni Marcos ug Duterte apan wala sila mokompyansa.
Ang deputy regional director for operations sa Police Regional Office 7 nga si Police Colonel Noel Flores gitakdang mohimo og inspection sa grandstand sa CCSC aron ilang maplantsa ang ilang deployment sa sulod sa pasilidad.
Gitakda nga tambungan kini sa di momenos 25,000 ka mga delegado gikan sa lainlaing rehiyon ug mga tawo nga mosaksi sa pagbukas sa Palarong Pambansa 2024. / AYB