Mohimo si Presidente Ferdinand ‘Bongbong’ Marcos Jr. sa iyang ikatulo nga State of the Nation Address (Sona) atol sa joint session sa Kongreso sa Batasang Pambansa Complex sa dakbayan sa Quezon, alas 4:00 sa hapon, Lunes, Hulyo 22, 2024.
Gipaabot nga iyagyag ni Marcos ang dagan sa iyang administrasyon, mga polisiya ug mga mahinungdanong prayoridad alang sa pag-uswag sa nasod sa nabiling katuigan sa iyang termino.
Kapin sa 2,000 ka mga bisita, lakip ang mga miyembro sa House of Representatives, Senado, ug mga langyaw nga diplomat, ang gikatakda nga motambong sa Sona.
Busa higpit ang seguridad ug dunay pagkabalda sa transportasyon sa palibot sa complex.
Tungod niini, ang Philippine National Police (PNP) mopakatap og dili mominos 22,000 ka security personnel, lakip ang 5,000 sa palibot sa Batasang Pambansa Complex lakip sa pagpatuman sa “no rally zones.”
Usa ka nationwide gun ban ipatuman usab sa Hulyo 22. Samtang ang mga opisyal walay nadawat nga taho sa hulga sa seguridad.
Magpakatap usab ang mga opisyal og 1,329 ka mga personahe aron maminusan ang pagkabalda sa trapiko ug mahatagan og libre nga transportasyon ang mga pasahero nga apektado sa mga pagsira sa dalan.
Ang mga aktibista gikan sa pipila ka grupo, apil ang mga unyon sa transportasyon sa Manibela ug Lumad, Bayan ug uban pa gikataho nga molusad og demonstrasyon alang sa pagpadayag sa kapakyasan sa administrasyong Marcos Jr.
Samang mga protesta-rali ang gikataho nga ipahigayon usab karon sa ubang dagkong sentro sa nasod sama sa dakbayan sa Sugbo, Davao ug uban pa. /RRM gikan sa wires