Gikataw-an ni Presidente Ferdinand Marcos Jr. niadtong Lunes, Mayo 6, 2024, ang mga pasangil nga naglambigit kaniya sa paggamit sa illegal nga drugas.
Sa usa ka ambush interview sa sideline sa Government-Owned and Controlled Corporations (GOCCs) Day sa Pasay City, si Marcos gihangyo sa pagkomento sa nagpadayon nga imbestigasyon sa Senado sa giingong pag-leak sa usa ka confidential nga dokumento gikan sa Philippine Drug Enforcement Agency (PDEA) nga nagpakita kaniya isip usa sa mga target sa usa ka anti-drug operation niadtong 2012.
Nagdumili siya pagtubag ug nikatawa na hinuon ug nilakaw na lang.
Sa sayo pa, si Marcos miingon nga dili niya “i-dignify” ang mga alegasyon nga naglambigit kaniya sa illegal nga drugas.
Ang imbestigasyon gipangulohan ni committee on public order and dangerous drug chairperson Senador Ronald dela Rosa, kanhi hepe sa Philippine National Police ug naila nga lunod patay nga tigpaluyo ni kanhi Presidente Rodrigo Duterte.
Sa sayo pa, si Duterte nilusad og pipila ka mga pag-atake batok kang Marcos, ang iyang gipulihan, bisan sa pagtawag kaniya nga usa ka adik sa droga ug “bangag,” usa ka termino nga lokal nga gigamit sa paghulagway sa usa ka tawo nga high sa ilegal nga droga.
Matod niya, gipakita sa PDEA kaniya ang listahan sa mga drug personalities nga naglakip kang Marcos.
Pipila ka semana human sa mga tirada ni Duterte, usa ka Authority to Operate ug usa ka Pre-Operation Report, nga parehong pinetsahan og Marso 11, 2012 ug giingong gi-issue sa PDEA, nilibot online ug nagpakita kang Marcos nga usa sa mga target.
Atol sa imbestigasyon sa Senado, si Jonathan Morales, kanhi ahente sa PDEA, niangkon nga lehitimo ang dokumento, nga nag-ingon nga siya ang nagproseso niini ug nag-interbyu sa asset.
Apan sa samang pagdungog, si PDEA Director General Moro Virgilio Lazo nibarog nga walay ingon niini nga mga dokumento sa PDEA Plans and Operations Reports Management Information System o Pormis.
Giangkon hinuon niya nga wala pay PORMIS niadtong 2012 apan aduna silay Data Monitoring System. / TPM / SunStar Philippines