Dakong plantasyon sa marijuana gi-raid sa mga sakop sa intelligence operatives sa 2nd Provincial Mobile Force Company (PMFC), Provincial Drug Enforcement Group (PDEG) ug Special Operations Unit (SOU) sa Police Drug Enforcement Unit 7, ubos sa koordinasyon sa Philippine Drug Enforcement Agency (PDEA 7).
Ang ronda gilusad sa alas 3:40 sa hapon sa Biyernes, Oktubre 13, sa Sityo Kalubihan, Brgy. Tungkay, bukiran sa Siyudad sa Toledo.
Moabot ngadto sa 3, 000 ka hingkod na nga marijuana ang naibot nga may Dangerous Drugs Board (DDB) estimated value nga P1, 200,000.
Way nadakpan nga cultivator sa maong mga marijuana.
BUY-BUST
Nagtingkagol sa bilanggoan ang usa ka giilang high value individual nga suspetsadong drug pusher human nadakpan sa buy-bust operation sa Mandaue City Police Office (MCPO) sa Sabado sa alas 2 sa kaadlawon sa M.L. Quezon St., Brgy. Cabangcalan, Siyudad sa Mandaue.
Ang suspek giilang si Roy Fiel Ahig, hamtong, kinsa nasakmitan og 1,065 grams kun subra sa usa ka kilo sa gituohang shabu.
Ang drugas dunay street drug price (SDP) nga P7, 242,000.
Ang nilusad sa operasyon mao ang Station Drugs Enforcement Unit sa Police Station 4 ug City Intelligence Unit sa MCPO nga gipangulohan ni Police Major Mikhael Mallorca ubos sa direct supervision ni Police Col. Maribel B. Getigan.