Giawhag sa mga operator sa lokal nga barko ug maritime stakeholders sa Visayas ang Maritime Industry Authority (MARINA) sa paghimo og reporma sa ilang mga polisiya nga naghulga og kadaot sa domestic shipping operations tungod sa nagkagrabe nga kakuwang sa mga tripolante.
Sa usa ka open forum nga gipahigayon sa Bai Hotel Cebu sa Mandaue City, Hunyo 5, 2025, ang mga representante gikan sa Philippine Coastwise Shipping Association (PCSA) ug ubang maritime groups, atol sa ilang General Membership Meeting, nagpadayag sa ilang kasagmuyo sa mga polisiya nga matod nila nagprayoridad sa internasyonal nga mga sumbanan kaysa sa lokal nga mga basihan.
Si PCSA chairperson Lucio Lim Jr. nanawagan alang sa mas lig-on nga kalainan tali sa lokal ug gawas sa nasud nga maritime regulatory frameworks, ug niawhag sa nasudnong ahensya sa gobiyerno nga i-streamline ang mga proseso nga tumanon.
Gikompirmar og balik ni Department of Transportation (DOTr) Assistant Secretary for Maritime Villamor Ventura Plan ang iyang pasalig sa pag-overhaul sa mga regulasyon sa maritime nga nakaapekto sa domestic shipping industry isip pag-ila sa mga kabalaka gikan sa mga operator bahin sa dili angay nga paggamit sa internasyonal nga mga sumbanan sa paglawig ngadto sa lokal nga mga barko.
Si Transportation Secretary Vince Dizon nakatakda untang motambong sa general meeting apan wala nadayon tungod sa kalit nga imbitasyon gikan sa Senado, hinungdan nga si Plan ang nisulti alang kaniya.
Namulong atol sa general assembly, gitumbok ni Plan ang tuyo sa gobiyerno nga ipadayon ang gipahaom nga mga lagda alang sa lokal nga sektor, nga naghisgot sa Magna Carta for Filipino Seafarers isip usa ka sumbanan nga balaod nga naghatag gahom sa MARINA sa paghimo og lahi nga mga framework alang sa local shipping.
Ang PCSA mao ang labing dakong shipping association sa nasod nga gilangkuban sa mga tag-iya og barko nga Pilipino nga nag-operate og labaw sa 700 ka mga barko nga nagserbisyo sa liboan ka mga pasahero ug nagdala og mga karga sa tibuok nasod.
Grabe nga krisis sa mga tripulante
Gibutyag ni Lim ug sa iyang mga miyembro nga pipila sa ilang operasyon temporaryo nga gipahunong tungod sa kakuwang sa kwalipikadong mga tripulante, nga naghisgot sa epekto sa kasamtangang mga regulasyon sa MARINA nga nagkinahanglan sa mga seaman bisan sa mga ruta sa domestic—sa pagsunod sa global Standards of Training, Certification and Watchkeeping for Seafarers (STCW) protocols.
Ang sitwasyon nagkagrabe kay daghang kuwalipikadong Pilipino nga seaman ang ningpili nga mosakay sa internasyonal nga mga barko.
Gipaambit sa mga tag-iya og barko nga pipila sa ilang mga barko napugos sa paglangan o pagkansela sa mga biyahe tungod sa kakuwang sa lisensyadong deck officers, nga nagkinahanglan og grabeng mga lakang sama sa pagkuha og mga kapitan gikan sa ubang pantalan aron lang matuman ang regulatory minimums.
“The current standards imposed under the STCW Convention are being applied uniformly—even to vessels operating solely in local waters,” asoy ni Lim.
Gipasabot niya nga dili kini angay alang sa mga barko nga ubos sa 250 gross tonnage nga naglawig sa mubo nga distansya o inter-island routes.
Kining mga barkoha ubos sa ‘near-coastal’ nga operasyon ug angayan og lokal nga mga lagda.
Giawhag sa mga lider sa industriya ang MARINA sa paghimo og lahi nga hugpong sa mga kuwalipikasyon ug career progression alang sa domestic seafarers.
“Why are we forcing small local ships to follow international standards meant for large, ocean-going vessels?” pangutana ni Lim.
Ang ubang mga nasod sama sa China, Japan ug United States adunay lahi nga sistema sa paglisensya alang sa domestic shipping ug nisugyot si Lim nga puwede kining gamiton sa Pilipinas. / EHP