Aron masiguro nga andam ug masayod kon unsay angay nga buhaton panahon sa mga hulga ug emerhensya, pormal nga gibuksan sa National Maritime Center ang Inter-Agency Maritime exercise o ang Alalayan exercise nga gisuportahan usab sa Expertise France ug Europian Union Crimario II Project.
Si Vice Admiral Roy Eche-verria, Director sa National Maritime Center (NMC) nagkanayon nga ang himuon nga exercises dako og ikatabang sa maritime sector ilabi na sa tinuod nga hagit sa kinabuhi gikan sa foreign vessel intrusion ngadto na usab sa search and rescue operations.
“We continue enhancing our capability to respond to maritime threats with unity and precision,” matod ni Echeverria sa Mayo 22, 2025.
“This is not just an exercise. It’s our joint commitment in safeguarding the nation’s waters,” dugang niya.
Ang Alalayan exercises nagsugod niadtong 2023 nga gipahigayon sa kaulohan ug ang ika-duha sa Puerto Princesa, Palawan sa 2024.
Karong tuiga, gipili niini ang Sugbo nga maoy mo-host sa maong kalihukan aron masukod ang coordinated responses tali sa NMC, Regional Coordinating Center (RCC) Central ug ang uban pang mga ahensya gikan sa national ug regional levels.
Kini kabahin sa pagsuta kon insakto o duna baý angay korehian ug palambuon sa mga protocol nga gihan-ay sa higayon nga dunay maritime threats.
Si Ambassador Massimo Santoro, EU Ambassador to the Philippines nagtuo nga ang Pilipinas nakapakita sa kusog niini sa panaghiusa aron mapanalipdan ang ka-dagatan.
“The Philippines is setting a powerful example; it’s the flagship country of IORIS (Indo-Pacific Regional Information Sharing) ...The Philippines is demonstrating a firm commitment to addressing the complex challenges of the maritime domain through collaboration and coordination...” dugang niya.
Gilaoman ang pagsalmot sa 24 ka mga ahensya sa national ug local nga level nga mopakita sa ilang kapasidad sa pagtubag sa mga hulga sa kadagatan.
Sa iyang bahin si Vice Admiral Edgar Ybanez, Deputy Commandmant for Operations sa Philippine Coast Guard nagkanayon nga ang kadagatan sa Pilipinas angay gyud nga panalipdan sanglit mao kini ang kasagaran nga kuhaan sa panginabuhi sa mga Pilipino lakip na ang paghatag og seguridad sa nasod.
Nagtuo siya nga tungod sa kadaghan sa resources sa kadagatan sa Pilipinas, nagkadaghan usab ang hulga nga giatubang niini. / ANV