Martsa-rally atol sa Labor Day malinawon

 MGA BATA SA RALLY: Namatikdan nga dunay pipila ka mga bata ang gipaapil sa martsa-rally sa mga progresibong grupo atol sa Labor Day sa Miyerkules, Mayo 1, 2024. / ARNOLD Y. BUSTAMANTE
MGA BATA SA RALLY: Namatikdan nga dunay pipila ka mga bata ang gipaapil sa martsa-rally sa mga progresibong grupo atol sa Labor Day sa Miyerkules, Mayo 1, 2024. / ARNOLD Y. BUSTAMANTE

Gihulagway sa Police Regional Office (PRO 7) nga malinawon ug hapsay ang gilusad nga kalihukan sa mga progresibong grupo ug kahugpongam sa mga mamumuo atol sa pagsaulog sa Labor Day sa Miyerkules, Mayo 1, 2024.

Ubay-ubay nga sektor sa katilingban ang nagmartsa gikan sa Fuente Osmeña rotunda paingon sa downtown area sa dakbayan sa Sugbo aron ipa­dayag ang ilang yango-ngo sa gobyerno.

Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa PRO 7, nga wala sila makatala og bisan unsa nga kasamok nga hinimoan sa mga nag-rally.

Gawas sa mga progresibong grupo, gi-monitor usab sa kapulisan ang kalihukan sa Kagamhanan sa Dakbayan sa Sugbo timaan sa ilang pagsaulog sa Adlaw sa Pamuo.

Wala na maka-deploy ang PRO-7 og Civil Disturbance Management team tungod kay wala sila makabantay og kasamok. Gitahasan ang mga uniformed police personnel nga naa sa karsada nga nag beat patrol aron pagbantay nga way krimen.

Nakasaway lang si Pelare sa mga militanteng pundok human mabantayi nga dunay gagmay nga mga bata nga gidala ug gipauban sa pag-martsa sa rally taliwala sa naglagiting sa kainit sa adlaw.

Gitahasan sa PRO-7 ang Cebu City Police Office (CCPO) nga maoy moila kinsa kining mga hamtong na nga nagdala sa maong mga bata atol sa rally.

Dili na matod pa kini bag-o sanglit sa nanglabay nga mga martsa protesta sa mga progresibong grupo dunay mga gagmay’ng bata ang gipaapil sa rally. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph