‘Mas makusgan kon makasuyop og shabu’

‘SHABU KINAON.’ Nabilanggo sa Mamba­ling Police Station si Jaime “Epok” Fernandez, 43, manghakutay og bas human nakuhaan og duha ka putos sa gituohang shabu sa alas 2 sa Lunes sa kaadlawon, May 20, 2024 sa Sitio Alumnos, Brgy. Basak San Nicolas, dakbayan sa Sugbo. Ingon sa shabu na ang iyang pagkaon matag adlaw. Estorya sa pahina 2. / GUAM P. LOGROÑO
‘SHABU KINAON.’ Nabilanggo sa Mamba­ling Police Station si Jaime “Epok” Fernandez, 43, manghakutay og bas human nakuhaan og duha ka putos sa gituohang shabu sa alas 2 sa Lunes sa kaadlawon, May 20, 2024 sa Sitio Alumnos, Brgy. Basak San Nicolas, dakbayan sa Sugbo. Ingon sa shabu na ang iyang pagkaon matag adlaw. Estorya sa pahina 2. / GUAM P. LOGROÑO

Usa ka manghakutay og bas nagkanayon nga siya mas kusgan kon makasuyop og shabu hinungdan nga makadaghan kini niya buhaton sa usa ka adlaw.

Kini ang pangangkon ni Jaimei Fernandez, alyas Epok, 43, ulitawo, taga Alumnos, Brgy. Basak San Nicolas, dakbayan sa Sugbo.

Nasikop siya atol sa anti-drug operation sa kapulisan sa na­asoy nga dapit alas 2 sa kaadlawon sa Lunes, May 20, 2024.

“Akong pamahaw shabu. Paniudto shabu. Panihapon shabu. Aw, kondisyon kaayo hakot sa balas. Gaan na lang alsahon sinako,” matod ni Fernandez dihang nahinabi sa Superbalita Cebu sulod sa iyang selda.

Dugang niya nga mas daghan ang iyang mahakot nga balas kon nakasuyop og shabu ug para niya, ang usa ka sakong balas sama lang og usa ka gamay nga putos ang gibug-aton.

Giklaro ni Fernandez nga igo ra siya mamalit ug mogamit apan dili siya mamaligya og gidiling drugas.

Dason niya nga ang shabu iyang pinalit gikan sa Brgy. Duljo-Fatima.

“Sugaton ra man mi. Mga bata modunol sa shabu. Tag P200 makapalit na ka,” sumala ni Fernandez.

Gibutyag niya nga 16 anyos siya nagsugod paghingos og rugby ug nag-shabu na siya hangtod karon.

Nagmahay siya apan tinu­yoan man niya ang bisyo.

Andam niyang serbisyuhan ang iyang kasaypanan.

Si Major John Lynbert Yango, hepe sa Mambaling Police Station, nagkanayon nga nakadawat sila og impormasyon nga usa ka ginganlan og “Mating” nagbaligya og drugas sa lugar.

Gisubay sa kapulisan ang lugar ug naabtan si Fernandez, kinsa nakuhaan og duha ka putos nga shabu.

Atol ning pagsuwat, ang kapulisan wala pa mopagawas sa bana-bana sa kantidad sa nasakmit nga shabu. Si Mating wala na igkita human daling nakasibat pag-abot sa mga polis.

Samtang si Fernandez gitanggong sa kapulisan ug mag-atubang og kasong kalapasan sa balaod batok sa gidiling drugas. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph