Sa wala pa nihamag ang Gilas Pilipinas sa labing una niining tahas sa Fiba Asia Cup sa Jeddah, Saudi Arabia, gilab-as ni national coach Tim Cone ang iyang pagsalig nga maangkon sa iyang puwersa ang gold medal ning pretihiyusong kompetisyon, nga ipahigayon matag upat ka mga tuig.
“I’ll say it again. Our goal is to win a gold medal. That’s our goal. We are going to go out there and try to win a gold medal,” matod ni Cone nga napatik sa Spin.ph.
Hinuon, giklaro ni Cone nga sa pagkakaron, wala pa siya naghunahuna sa bulawan ug iyang gitanom sa alimpatakan sa iyang mga batos nga kinahanglang magtutok sa matag duwa.
Ning paguwat, wala pa masayri ang resulta sa labing unang tahas sa Gilas batok sa Chinese Taipei, nga gipahigayon alas 2:00 sa kadlawon ning Miyerkules, Agusto 6, 2025 (PH time).
Niadtong 2023, naagak ni Cone ang Gilas sa gold medal finish sa Asian Games, labing una sa Pilipinas human sa dul-an sa upat ka mga dekada.
Sa FIBA Asia Cup, mas lisod nga tahas ang sagubangon sa Gilas gumikan kay apil niini ang Oceana powerhouse teams nga mao ang Australia ug New Zealand.
Sa wala tuyoa, gikauban sa Gilas ang New Zealand sa Group D apil ang Chinese Taipei ug Iraq.
Sukad nga gihimong matag upat ka mga tuig nga kompetisyon ang Fiba Asia Cup (kanhi Fiba Asia Championship ug ABC Champiopnship) niadtong 2017, nagsalimuang ang kampanya sa Gilas.
Niadtong 2017, ang Gilas igo lang niangkon sa ikapitong puwesto unya sa pandemic postponed nga 2022 edition, ang Gilas wala nakasulod sa quarter-finals sa labing unang higayon ug igo lang kining nahiluna sa ikasiyam nga puwesto.
Niadtong mga higayuna, ang Gilas gigiyahan ni coach Chot Reyes.
Malaumon si Cone nga makalugnot gikan ning maong mangil-ad nga kasinatian ang Gilas ning higayuna apan giangkon niya nga tungason ang dalan nga ilang pagasubayon.
Ang mga sakop sa Gilas mao sila si naturalized Justin Brownlee, Dwight Ramos, June Mar Fajardo, AJ Edu, Scottie Thompson, Japeth Aguilar, Chris Newsome, CJ Perez, Carl Tamayo, Calvin Oftana, Jamie Malonzo, ug Kevin Quiambao.
Wala nalakip sa puwersa sa Gilas ning higayuna ang batan-ong higante nga si Kai Sotto gumikan kay nagpaalim pa kini sa iyang angol (ACL). / ESL