Mason nasikop sa buy-bust; P136K balor sa druga sakmit

Mason nasikop sa buy-bust; P136K balor sa druga sakmit
SunStar Local News GPX

Nalakip sa regional target list sa Philippine Drug Enforcement Agency (PDEA 7) nasikop sa gilusad nga buy-bust sa mga sakop sa Mabolo Police Station sa Sitio NGA, Barangay Lahug, dakbayan sa Sugbo, alas 4:30 sa hapon sa Huwebes, Marso 14, 2024.

Ang suspek giila nga si Ricky Palanas, 40, molupyo sa maong lugar.

Nakuha sa mga operatiba ang upat ka putos sa gituohang shabu nga motimbang og 20 gramos nga dunay estimated market value nga P136,000, lakip na ang buy bust money.

Matod ni Leia Alcantara, information officer sa PDEA 7, nga duha ka semana nila nga gipaubos sa case build up ang suspek human nadawat ang impormasyon.

Giingong makabaligya ang suspek og 20-30 gramos sa gituohang shabu matag semana diin ang iyang kustomer kasagaran mga construction worker ug call center agent.

Pasakaan siya og kaso nga kalapasan sa balaod sa pag­hupot ug pagpamaligya og gidiling drugas.

Si Alcantara una nang na­mahayag sa media nga nagpadayon ang ilang kampanya sa pagsumpo sa pagpayuhot sa gidiling drugas ug paglusad og edukasyon labina sa kabarangayan. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph