Sugdan na sa kagamhanan sa Probinsya sa Sugbo ang mass hiring drive aron matubag ang 1,667 ka mga bakanteng posisyon sa 16 ka hospital nga gidumala sa Kapitolyo.
Kini nga lakang nagtumong sa pagpalig-on og maayo sa healthcare system sa probinsya.
Kini nga inisyatibo, nga gipasiugdahan ni Governor Pamela Baricuatro, giubanan sa pagkonsiderar nga usbawan ang suweldo sa mga nurse ug doktor aron madani sa pagtrabaho sa gobyerno.
Sa kinatibibuk-ang bakanteng posisyon, 1,513 ang kasamtangang dunay pundo, samtang 154 pa ang nagkinahanglan og alokasyon.
Si Aldwin Empaces, assistant provincial administrator sa Kapitolyo, mipahayag sa Facebook page sa Kapitolyo, “The governor’s marching order is, ‘Get it done.’”
Giklaro ni Empaces nga ang eksaktong gidaghanon sa personnel nga i-hire magdepende sa staffing requirements sa upat ka provincial hospitals ug 12 ka district hospitals, human sa assessment sa Department of Health Central Visayas (DOH 7) ug sa Cebu Provincial Health Office (CPHO).
Ang ilang mga rekomendasyon isumite sa Office of the Governor alang sa pag-aprobar, uban sa tumong ni Baricuatro nga makompleto kini nga mga pag-hire sulod sa iyang unang 100 ka adlaw sa katungdanan.
Ang mga posisyon nga pun-on naglakip sa nurse, midwife, doktor, dentista, pharmacist, radiologist, administrative aide, engineer, laboratory technician, sanitation inspector, medical specialist, labandero, driver, ug kusinero, nga dunay salary grades gikan sa SG 1 ngadto sa 26.
Ang pagpalig-on sa healthcare services maoy usa sa mga sukaranan sa kampanya ni Baricuatro, nga nakadaog og landslide sa eleksyon sa Mayo.
Si Dr. Mary Ann Josephine Arsenal, CPHO officer-in-charge, mipasiugda sa kritikal nga panginahanglan alang sa dugang kawani.
“Ang lack of personnel, mo-reflect man sad gud na sa ato nga output,” matud niya, nga miila nga ang kakuwang sa kawani maoy pangunang rason sa panglantaw sa publiko sa dili igo nga serbisyong medikal sa mga hospital nga giduma sa Kapitolyo.
Nagpasalamat si Arsenal sa bag-ong gobernador sa paghatag og prayoridad sa mga programa ug proyekto sa panglawas.
“Na-feel gyod namo nga priority na ang health and open gyod si Guv for improvement. Overwhelmed kaayo mi kay full support gyod si Gov. Pam,” matud ni Arsenal. / JPS