Bisitahon pag-usab ni Cebu City Mayor-elect Nestor Archival ang kasamtangan nga master drainage plan sa dakbayan aron ipaangay kini sa kalambuan sa siyudad.
“The master drainage plan is there, it’s just a matter of upgrading it,” matod ni Archival sa usa ka phone interview niadtong Martes, Hunyo 10, 2025, nga namatikdan nga ang plano katapusang gi-update sa tuig 2000.
Sa dihang gipangutana bahin sa mga kahuyangan sa master plan, giklaro ni Archival nga dili kini kinaiyanhong mga sayop apan duna gyuy usbon tungod sa bag-ong mga istruktura ug mga kalambuan sa tibuok siyudad.
“Of course naa gyud na siyay usbonunon. It’s not the weakness, usbon gyud na siya,” matod niya.
Gitinguha ni Archival ang pagtutok sa tibuok sistema sa drainage nga maglantaw sa usa ka plano sa tibuok dakbayan.
Matod niya nga kon ang usa ka barangay nakamugna na sa kaugalingon nga drainage plan, ang iyang administrasyon mokonsiderar sa paghiusa niini.
Bahin sa timeline sa pagpatuman sa master drainage plan, nagtuo si Archival nga ang kalangay moabot og unom ngadto sa siyam ka bulan.
Gipasabot niya nga taas kaayo ang proseso nga sundon nga maglakip sa pag-endurso sa konseho sa siyudad ug pag-agi sa bidding nga puwerting dugaya.
Ang pakiglambigit sa ubang mga local government units (LGUs) importante sab.
“Mataudtaoran na ang master drainage plan. Timan-i baya nga i-coordinate na sa uban LGUs,” pasabot ni Archival.
Alang sa dinalian nga pagsulbad sa baha, gisugyot ni Archival sa Department of Public Services (DPS) ug sa City Disaster Risk Reduction and Management Office (CDRRMO) ang paghimo dayon sa mga operasyon sa pagpanglimpyo sa lapok ug pagbara sa mga lugar nga kanunay nga gibahaan.
Plano ni Archival nga magpatawag og miting uban sa disaster office aron magtukod og “swamp” system nga magsilbi nga rainwater catchment area sa mga lugar nga kanunay nga gibahaan nga adunay mga bomba aron tangtangon ang sobrang tubig.
“About how fast they can do that, they’re going to answer that,” dugang niya.
Nasinati sa Cebu City ang dakong baha niadtong Hunyo 6, 2025, ilabi na sa mga barangay sa Mabolo ug Tejero human sa kusog nga pag-ulan. / JPS