Mipakita sa iyang pinakanindot nga duwa sul-ob ang Dallas uniform si P.J Washington samtang galingkod sa bench ang ilang superstar nga si Luka Doncic tungod sa sore knee.
Gituldokan ni Washington ang iyang career night og game-winning layup sa nahabiling 4.5 segundos aron ituboy ang Dallas Mavericks ngadto sa 108-106 nga kadaugan kontra Golden State Warriors sa National Basketball Association (NBA) kagahapon, Abril 6, 2024 (PH time).
Nakabuhat og 32 puntos si Washington nga mao ang iyang highest scoring output sukad nakuha siya sa Mavericks gikan sa Charlotte sa wa pa ang trade deadline.
Ang All-Star guard nga si Kyrie Irving niamot og 26 puntos alang sa kadaugan sa Mavericks nga maoy niputol sa six-game winning streak sa Warriors.
Napalig-on sa Mavericks ang ilang gunit sa ikalima nga pwesto sa Western Conference standing bitbit ang 47-30 (win-loss) nga baraha ug mas nihayag na ang ilang oportunidad nga makakuha og luna sa postseason.
Ang Top 6 teams sa matag conference maoy makakuha sa guaranteed playoff spots, samtang ang anaa sa ikapito ngadto sa ikapulo maapil pa sa play-in nga tinaktakay.
Sama sa naandan, gitimon ni Stephen Curry ang Warriors sa iyang 28 puntos, lakip na niini ang tying-jumper sa nahabilin nga 13 segundos sa duwa.
Naglabaw ang Mavericks og 16 puntos apan napapas kini sa fourth quarter.
Natabla ni Curry ang iskor sa 106-all human nasipyat ni Washington ang usa sa iyang duha ka free throws.
Sa pikas nga play, gi-double team si Irving, gipasa niini ang bola kang Tim Hardaway Jr., nga maoy nitunol sa bola kang Washington para sa go-ahead layup.
Nakuha pa pagbalik sa Warriors ang bola apan nasipyat si Klay Thompson sa potensiyal nga game-winning nga tres. / RSC