Sama sa gilauman, gipili sa Dallas Mavericks si Duke star Cooper Flagg isip No. 1 overall pick sa 2025 National Basketball Association (NBA) Draft ning Huwebes, Hunyo 26 (PH time).
Niini, nanghinaot ang Mavericks nga nakabaton sila og bag-ong franchise superstar isip hulip ni Luka Doncic, kinsa nabalhin sa Los Angeles Lakers niadtong Pebrero 1 baylo ni Anthony Davis sa usa ka makapakugang nga trade.
“I’m really excited. I think I keep saying I’m excited to be a sponge, to get down there and just learn, be surrounded by Hall of Fame-caliber guys and just to be able to learn from them,” matod ni Flagg.
“It’s going to be an incredible experience.”
Daling gihangop sa Mavericks fans si Flagg, kinsa nag-average og 19.2 puntos ug 7.5 rebounds sa college basketball diin naagak niya ang Duke sa semi-finals.
Si Flagg, 18, kinsa lumad nga taga Newport, Maine, gituohan nang daan nga mahimong No. 1 pick human kini giimbitar nga moapil sa training camp sa U.S. Olympic team niadtong summer.
Ang Newport, Maine nagsaulog sa pagkasulod ni Flagg sa NBA.
“It means a lot to me to have the support of the whole state. I know how many people showed up today and supported me at some of the draft parties back home,” asoy ni Flagg.
“It feels amazing knowing I can inspire younger kids. I was in their shoes really not that long ago, so just to know I can give those kids those feelings and have the whole state behind me, it means a lot.” /Gikan sa wires