Kapin sa 1000 ka mga tinun-an sa Buhisan Elementary ug Night High School ang mobalik sa blended-modular learning tungod kay gikonsiderar sa kagamhanan sa Dakbayan sa Sugbo ang pagsuspenso sa face-to-face (F2F) classes tungod sa pagpangliki sa sawog ug bongbong sa eskuylahan.
Si Mayor Raymond Alvin Garcia niingon niadtong Lunes, Marso 17, nga bukas siya sa pagdeklarar og “State of Emergency” sa Brgy. Buhisan nga nagkinahanglan og pag-aprobar sa City Council.
Ang Office of the Building Official (OBO), Mines and Geosciences Bureau Central Visayas (MGB) 7, ug ang Department of Engineering and Public Works (DEPW) nirekomendar sa pagbalhin sa eskuylahan o mopatuman ang engineering ug interventions aron kalikayan ang motumaw nga mahitabong katalagman.
Ang eskuylahan anaa gitukod sa bukid hinungdan nga nameligro ang building labina karon nga daghan nangliki sa semento.
Matod ni Garcia nga makigtagbo siya sa Department of Education (DepEd) Cebu City Division, sa City Disaster Risk Reduction and Management Office (CDRRMO), ug ubang ahensiya sa kagamhanan karong adlawa aron tukion ang sulosyon.
Gitataw sa mayor nga ang principal dunay katungod nga mosuspenso sa F2F classes kon nameligro ang kahimtang sa mga tinun-an.
Kon masuspenso ang klase, ang mga school building ipaubos sa retrofitting basi sa rekomendasyon gikan sa city engineering department.
Apan matod ni Garcia lisod ang pagpangita og kabalhinan sa eskuylahan tungod kay ang Barangay Buhisan nahimutang sa bukid ug lisod ang pagpangita og dakong lugar nga maoy tukoran.
Ang mga opisyal sa tunghaan, barangay ug dakbayan naniguro alang sa kaluwasan sa mga tinun-an ug mga magtutudlo sa naasoy nga tunghaan tungod sa nag-ung-ong nga risgo. /EHP