Human nipasangil si Konsehal Nestor Archival nga pipila ka budgetary allocations sa Siyudad sa Sugbo nga gi-realign alang sa livelihood support program usa ka “political tool,” si Mayor Raymond Alvin Garcia nihimakak niini ug niingon nga ang maong lakang usa ka dole-out nga nagsugod pa niadtong 2021.
Matod pa ni Garcia nga ang budget alang sa livelihood program anaa na sukad sa administrasyon ni anhing mayor Edgardo Labella ug kanhi mayor Michael Rama.
“But that has been constantly there in all of the budgets of mayor Mike, Labella, naa gyud na,” sumala niya sa press conference sa Lunes, Enero 27, 2025.
Sa sayo pa atol sa executive session niadtong Huwebes sa miaging semana, si Archival kinsa modagan pagka mayor sa Siyudad sa Sugbo sa umaabot eleksyon karong bulan sa Mayo uban ni kanhi mayor Tomas Osmeña isip iyang bise niingon nga iyang nahibaw-an nga ang budget alang sa Parks and Playgrounds nga mokabat sa P120 milyunes gi-realign alang sa livelihood program.
Gipasabot ni Garcia nga walay nahitabo nga realignment sa budget kondili ang pag-implement lang niini.
Dugang niya nga ang budget nga iyang gipatuman alang sa livelihood programs maoy gahin sa miaging administrasyon.
Si Garcia niingon nga kon adunay realignment sa budget, moagi una kini sa konseho sa dili pa maaprobahan.
“Realignment requires council approval, he [Archival] would’ve known,” sigon niya.
Naaghat ang diskusyon sa dihang gihangyo ni Archival ang City Treasurer’s Office (CTO) atol sa usa ka executive session niadtong Miyerkules, Enero 22, 2025, nga tan-awon ang alokasyon sa budget alang sa pilot materials recovery facility (MRF) nga moabot sa P50 milyunes.
Si Archival niingon nga ang gitumong nga budget alang sa MRF kinahanglang dili gamiton sa ubang mga proyekto ilabi na nga nagpadayon na ang panahon sa piniliay.
“Ting election baya ron unya kanang mga funds ibalhin,” matod ni Archival.
Ang konsehal nihangyo sa City Treasurer’s Office nga tan-awon ang pagbalhin sa pundo gikan sa mga Parks and Playgrounds ngadto sa mga livelihood programs.
Sa text message sa SunStar Cebu niadtong Lunes, si Archival nagkanayon nga base sa iyang nahipos nga inpormasyon, ang P125 milyunes nga budget nga orihinal nga gi-allocate para sa Ecopark giingong gigamit sa pagpundo sa sweldo sa 900 ka job order personnel.
Nagtuo si Archival nga ang pagbalhin sa pundo usa ka “technical malversation.”
“What makes this even more concerning is the timing of the program, just before the elections. This so-called ‘livelihood program’ appears to be a blatant form of vote-buying orchestrated by the executive, exploiting public funds for political gain in a crucial election period,” nagkanayon si Archival.
“This misuse of taxpayer’s money serves no genuine purpose and undermines public trust,” dugang niya.
Aron hisgutan ang kahimtang sa livelihood program sa kagamhanan sa Siyudad sa Sugbo apil na ang dole-out para sa mga kabus, giimbitar ni Archival ang City Budget Office, Department of Social Welfare Services, Cebu City Agriculture Department, Department of Manpower Development and Placement, Division of the Urban Poor, ug ubang mga buhatan nga nalambigit sa livelihood programs alang sa usa ka executive session sa Pebrero 12, 2025. / JPS