Niumol og assistance desk si Cebu City Mayor Raymond Alvin Garcia aron nga mapadali ang pagproseso sa dokumento sa mga residente nga nanimuyo sa luna nga nasulod sa Provincial Ordinance 93-1.
Ang mayor nipirma og Executive Order (EO) 14 niadtong Martes, Mayo 6, 2025, nga naghulma og 93-1 action center ug held desk nga moatiman sa panginahanglanon sa kapin sa 5,000 ka mga lumolupyo nga sagad kanila nagpuyo sa maong luna sulod na sa kapin sa tulo ka dekada nga way pormal nga titulo nga gihuptan.
Pinaagi sa maong kamanduan, gitahasan ang City Assessor’s Office (CAO) nga mopahigayon og bag-ong appraisal ug valuation sa maong luna.
Ang maong valuation magsilbi nga basehanan alang sa financing terms nga gitanyag Home Development Mutual Fund or Pag-Ibig Fund.
Ang action center ug help desk mo-operate pinaagi sa CAO, Division for the Welfare of the Urban Poor (DWUP), the City Treasurer’s Office (CTO), and the City Legal Office (CLO).
Gitudlo ni Garcia si City Administrator Kristine Joyce Batucan isip chairperson sa 93-1 Action Force samtang ang ubang miyembro niini naglakip nila ni Renato Osmeña (vice-chair), CAO assistant head Nova Batiller, DWUP chief Ronald Anthony Librando, CTO head Mare Vae Reyes ug CLO chief Santiago Ortiz.
Ang matag homeowners’ association adunay liaison officer, ug pinaagi sa suwat magsilbi nga tulay tali sa asosasyon ug siyudad alang sa communication ug information sharing. / JPS