Mitanyag si Acting Cebu City Mayor Raymond Alvin Garcia og reward money nga P100,000 alang niadtong makahatag og inpormasyon sa mga suspek nga mitulis sa duha ka mga tindahan sa alahas sa Barangay Ermita, dakbayan sa Sugbo.
Gikan sa iyang personal nga pundo ang maong reward money sa tinguha nga masulbad gilayon ang maong pagtuli sa Macy’s Gold and Silver Jewelry store ug DGC D’Gold Chain Jewelry.
Dugang pa ni Garcia nga adunay pipila ka mga negosyante, kinsa iyang mga higala, ang misaad og dugang reward money.
Pagka sunod adlaw human sa pagpanulis, ang Macy's Gold and Silver Jewelry nga tindahan niabli og balik sa alas 10:00 sa buntag niadtong Biyernes, Agusto 9, 2024.
Samtang, ang kasikbit nga DGC D'Gold Chain Jewelry nagpabiling sirado sa pagkakaron.
Ang Macy’s Gold and Silver Jewelry store nawad-an og P10 milyunes nga kantidad sa mga alahas, samtang ang DGC D’Gold Chain Jewelry nawad-an og P4 milyunes nga kantidad sa mga alahas.
Si Garcia niingon nga sa inisyal nga imbestigasyon sa kapulisan natumbok na ang duha ka mga suspek, kinsa mao ang mga indibidwal nga nibiya sa motorsiklo sa Barangay Sto. Niño, lakip na ang mga helmet nga gigamit sa krimen. / EHP