NANAWAGAN si Cebu City Mayor Raymond Alvin Garcia sa kauban niyang mga kandidato nga tangtangon na ang ilang mga campaign materials gikan sa gidili nga mga lugar nunot sa pagsugod na sa election campaign period.
Gipahibawo sa mayor nga iyang ipatangtang ang mga illegal materials apil na ang kaugalingon niyang mga campaign poster ug sa iyang mga kauban sa partido nga gipamutang bisan asa.
Atol sa press conference niadtong Lunes, Pebrero 10, 2025, si Garcia nimando sa City Administrator’s Office nga ipatuman ang kamanduan sa konseho nga panangtangon ang tanang mga tarpaulin, posters ug ubang election materials nga gipamutang sa kilid sa karsada.
Niadtong Miyerkules, Pebrero 5, si Konsehal Pastor Alcover nakaobserbar nga dunay mga campaign materials sa mga local ug national candidates nga gipanglansang sa mga punoan sa kahoy nga dili designated areas.
Gitumbok ni Alcover ang Republic Act No. 3571,nga nagdili sa pagputol o pagguba sa mga punoan sa kahoy o mga tanom sa mga publikong lugar sama sa kadalanan, plaza, parks, o sud mismo sa mga eskuylahan.
Ang mga molapas mahimong prisuhon sud sa unom ka buwan og usa ka adlaw ngadto sa unom ka tuig ug usa ka adlaw.
“It harms the environment, and I acknowledge that even some of my own posters may have violated these rules. No one is exempt. All illegal materials will be removed,” matod ni Garcia.
Si Garcia nitahas sa City Administrator's Office nga makigtambayayong sa mga team sa Prevention, Restoration, Order, Beautification, and Enhancement (PROBE) Unit, City Environmental and Sanitation Enforcement Team (CESET), ug sa City Environment and Natural Resources Office (CENRO) aron limpyuhan gikan sa mga poster ang mga non-designated areas.
Apan giklaro ni Garcia nga way silot nga ipahamtang batok sa mga kandidato nga nakalapas ning maong lagda.
Iya sab nga gitataw nga dinalian ang pagpanangtang sa mga poster. / EHP / ANV