Ang mga eridero sa luna ni Maria Zambrano niduso og reklamo sa buhatan sa Ombudsman Visayas batok sa mga miyembro sa Sanguniang Bayan sa Lungsod sa Dalaguete, Probinsiya sa Sugbo.
Ang mga reklamante girepresentahan nilang Jose Rene Moran ug Braulio Moran.
Ang mga respondent sa reklamo mao silang Vice Mayor William Lagahid ug mga konsehal nga silang Ernesto Tangpos, Kevin Belandres, Felix Villacorta, Royce Nikko Cesante, Hilario Belciña; ABC President Elmer Licaros; ug ang SK President nga si Danilo Sombilon Jr.
Lakip sa mga gipasaka nga reklamo mao ang kalapasan sa Republic Act 3019 o ang the Anti-Graft and Corrupt Practices Act, gross negligence, serious misconduct, ug serious dishonesty.
Matod sa abogado nga si Joey Borinaga nga ang reklamo nagsugod human nga ang local nga kagamhanan sa Dalaguete nagtukod og warehouse sa dul-an 4,000 square meter sa luna nga gipanag-iya sa mga reklamante nga naa nahimutang sa Barangay Tapon sa maong lungsod.
Nipasangil ang mga reklamante nga ang munisipyo wala makig-alayon kanila o nipahibawo man lang nga dunay gitukod nga proyekto ang lungsod.
Matod ni Borinaga nga nisuwat ang mga reklamante ngadto sa buhatan sa mayor nga dili nila ibaligya ang maong luna apan bisan pa man niini ang lungsod nipadayon sa pagtukod sa building sa warehouse nga naa saa maong luna.
Dugang ni Borinaga nga walay deed of sale nga gihatag ang iyang kliyente ngadto sa municipal government.
Ang warehouse gitukod niadto pang Hulyo 2024 nga nakapakurat sa mga manununod sa luna diin ang maong proyekto nigasto og P8.1 mulyunes.
Ang maong luna nabutang sa hilit nga lugar nga layo sa ilang panimay sa mga tag-iya hinungdan nga wala sila masayod nga duna na diay gitukod nga warehouse.
Tungod niini, niduso sila og lahi nga reklamo ngadto sa Ombudsman batok kang Mayor Ronald Allan Cesante.
Gibutyag ni Borinaga nga niadtong Marso 10, 2025, ang Sanguniang Bayan atol sa ilang session nilakip sa order of business aron pagpagawas og pundo alang sa pagpalit sa maong luna.
Human masayod niini ang mga reklamante , nipadala sila og suwat ngadto sa Sanguniang Bayan pagpahibalo nga wala silay plano nga ibaligya kini.
Niadtong Abril 28, 2025, ang konseho niaprobar pag-release sa pundo apan sa ordinansa wala mabutyag kon pila ang kantidad sa pagpalit sa maong gidak-on sa luna.
“Nagpadala na mi og letter sa secretary sa office of Sanguniang Bayan para mag-inform nila nga dili mosugot ang mga eridero nga wala gyuy palit nga mahitabo,” matod ni Borinaga.
“Ilaha gihapong gi-approve bisan og nakadawat sila og letter sa heirs ni Maria Zambrano nga dili sila mosugot nga ibaligya ang maong yuta,” dugang niya.
Alang ni Borinaga nga usa ka dakong irregular sa lungsod ang pagpagawas og pundo nga wala ma-identify ang kantidad.
Sa pagkutlo ning balita wala pa mopagawas og tubag ang gipangreklamo nga mga opisyal sa Dalaguete.
Kahinumdoman sa unang pamahayag, si Mayor Cesante nihulagway sa reklamo nga pamulitika ug ang mga molupyo sa lungsod walay labot niini.
“However, all those are still evaluated at the OMB, we submitted replies & I understand all agencies were able to comply,” matod ni Cesante. / AYB / GPL