Ipatuman ni Cebu City Mayor Raymond Alvin Garcia ang mga lagda sa Cebu City Heritage Council (CCHC) aron masugdan na ang plano sa siyudad nga pagtukod og usa ka heritage district.
Ang CCHC maoy tahasan sa pagpreserba, pag-atiman, ug pagpalambo sa cultural ug historical heritage sa Dakbayan sa Sugbo.
Gilauman ni Garcia nga ang guidelines maglakip sa mga sukaranan sama sa taas sa mga building, construction materials, ug uban pang aspeto. Gipasiugda niya ang proseso sa pagpreserba sa heritage sites ug nanginahanglan kini og lawom nga pagtuon una pa kini ipatuman.
“I don’t think nga naay mga challenges, I think gitan-aw lang gyud ni pag-ayo sa heritage council. Dili man gud ni ingon ana ka sayon, you know, we are talking about preservation and conservation of our heritage sites,” pasabot ni Garcia.
“I think this is a very delicate matter kay daghan pa kaayo’g kinahanglan studiohan before we can really make the ordinance and implement it,” dugang pa ni Garcia.
Ang gi-propose nga heritage district maglangkob og dakong bahin sa syudad, sugod sa interseksyon sa V. Rama Avenue ug N. Bacalso Avenue, padulong sa P. Del Rosario Street, dayon sa Imus Street, hangtod sa interseksyon sa General Maxilom Avenue ug Tejero Creek paingon sa Cebu Port Authority sa Pier 6.
Gikan sa Pier 6, molahos kini sa baybayon sa Barangay Sto. Niño ug Quezon Boulevard.
Apil usab sa district ang Abellana Street ug ang mga interseksyon sa Gen. Gines Street, R. Magsaysay Street, ug JM Basa Street, una kini mobalik sa sinugdanan sa V. Rama–N. Bacalso intersection.
Ang heritage district council pagadumalahan sa city mayor o vice mayor, uban ang duha ka konsehal nga morepresentar sa Komitiba sa Turismo, Kultura ug Arte, ug usa ka representante sa pribadong sektor nga itudlo sa mayor. / JPS