Gihimong legal ni Cebu City Mayor Raymond Alvin Garcia ang pag-ukopar sa mga fish vendor sa Pasil ug Suba ug pagbutang og canopy o pandong sa Pasil Fish Market aron matabonan sila gikan sa kainit sa adlaw.
Si Garcia nilagda og lease agreement tali sa mga vendor ug nisaad nga mobutang og dugang canopy sa merkado.
Ang desisyon sa mayor nahimo atol sa gihimong general assembly sa mga vendor niadtong Biyernes, Mayo 2, 2025.
Mga sakop sa Pasil, Suba Vendors Association (Pasacava), uban sa mga fish retailers ug wholesalers, nakigtagbo sa mayor aron ipresentar ang mga isyu.
Gipaabot sa mga vendor ang pagtawag kanila og “ambulant vendors.”
Matod nila, nag-ukopar sila og stalls sud sa merkado.
Gitug-an sa mga lab-asera nga maapektuhan gyud ang baligya nilang mga isda kon mabuwad sa init.
Ang merkado way atop ug bantang kaayo sila sa init sa adlaw.
Si Jason Jesem, usa sa mga opisyal sa Pasacava nagkanayon nga ang mga vendor nihangyo og lease agreement alang sa ilang mga stall.
Kini aron maghimong legal sa pag-ukopar nila’g stall sa merkado.
Matod ni Jesem nga ang siyudad nisaad nga mobutang og canopy sa merkado sunod semana. (PR)