NAKAKITA og basehanan ang Office of the Ombudsman-Visayas aron ipadayon ang imbestigasyon batok sa mayor sa Lungsod sa Poro, Edgar Gary Rama ug laing duha ka opisyal tungod sa paggamit sa pribadong luna alang sa pagpalapad sa public cemetery ug mass burial.
Sa giluwatang desisyon nga gipetsahan og Marso 17, 2025, gimanduan sa Ombudsman si Rama, Municipal Cemetery Coordinator Pablito Garciano, ug Cemetery Administrator Val Ryan Rosauro pagsumiter sa ilang counter-affidavits sulod sa 10 ka adlaw.
Gipasanginlan sila og dishonesty, grave abuse of authority, misconduct, oppression og kalapasan sa Republic Act 3019 o ang Anti-Graft and Corrupt Practices Act, ug ang Code of Conduct and Ethical Standards for Public Officials and Employees.
Ang reklamo naggikan sa paggamit sa 6,767-square-meter nga bahin sa 13,008-square-meter nga luna nga gipanag-iya sa RMD Agricultural Development Inc., nga nahimutang sa Barangay Paz nga wala’y pagtugot sa kompanya.
Si Ramon “Nito” Durano III, presidente sa RMD, nibutyag nga ang gobiyerno sa Poro nagkolekta og sobra sa P5 milyunes nga bayad sa lubong gikan sa mga pamilya nga naggamit sa luna bisan walay pagtugot.
Ang mga nagreklamo nagtinguha nga mabalik nila ang luna ug nangayo og injunction aron dili na maggamit pag-usab ang luna sa samang katuyoan. Matod sa mga nagreklamo nailad ang mga pamilya sa gipatuo nga ang lugar gihimong menteryo. Gipadayag sa RMD nga ilang nadiskobrehan ang paglapas sa ilang luna niadtong Disyembre 2024, hinungdan nga nipasaka sila og duha ka kaso sa Municipal Trial Court niadtong Enero.
Usa ka survey sa kompanya nagpakita nga sobra sa katunga sa luna ang gigamit alang sa sementeryo.
Ang mga dokumento nga gilakip sa reklamo nagpakita nga si Rama nipirma sa mayor's permit alang sa mga lubong, samtang si Garciano ug Rosauro niduso nga ang bayad adto ideretso sa opisina sa municipal treasurer.
Gipasidan-an sa Ombudsman ang mga respondent pagsunod sa mando kay kon mapakyas mawa ang ilang katungod sa pagpresentar sa ilang bahin, ebidensya. / JPS