Nipasidaan si Mayor Cesar “Didoy” Suan niadtong molabay sa ilang mga basura ilabi na mga medical wastes sa Lungsod sa Cordova nga dili siya magduhaduha sa pagpasaka og kaso.
“We warn them. Di ko moingon palihug but again we warn you nga dili labayanan og basura ang Lungsod sa Cordova. Ang inyohang basura, inyoha,” matod ni Suan sa Agusto 6, 2026.
Nasayran sa mayor nga dunay nagpataka og labay sa mga medical wastes sa bakanteng luna sa Barangay Alegria sa maong lungsod.
Matod ni Suan nga gihimo na sa kagamhanan ang pasiunang imbestigasyon.
Nasuta nga ang gilabay nga basura gikan sa usa ka aesthetic clinic apan wala pa mahibaw-i kon asa o kinsay tag-iya sa maong klinika.
Giingong dunay gisugo nga trisikad driver nga maoy molabay sa basura ug giingong didto kini gilabay sa bakante nga luna.
“We appreciate nga moduol mo sa amoa kay naa mi solid waste management office unya kon maglisod mo og labay makatabang mi, kaysa inyong buhaton nga inyong ilabay ang basura sa Cordova kay bisan asa mo gukdon gyud mo namo,” dugang ni Suan.
Dugang niya nga dili niya palabyon ang susamang insidente kay makadaot kini sa kalikupan ilabi na sa kadagatan sa lungsod.
Una na nga gipahibalo sa mayor nga mahimo nga moluwat og notice of violation ang Environmental Management Bureau (EMB) sa mga mohatod o establisimento nga mopalabay aron ma-revoke ang permit sa pag-transport o paglabay og mga hazardous wastes sa dili insaktong labayanan. / ANV
