Gisuspenso sa Office of the Ombudsman sulod sa unom ka mga buwan si Dalaguete Mayor Ronald Allan Cesante, Bise Mayor William Lagahit, Konsehal Kevin Belandres, ug laing siyam pa ka mga opisyal.
Ang uban pang mga opisyal nga gipahamtangan og preventive suspension mao sila si Municipal Engineer Expedezitas Lenares, Zoning Officer II Assandre Amprad, Administrative Aide VI Claire Bacala, Local Legislative Staff Officer II Loel Fajardo, Municipal Budget Officer Brenda Vergara, Municipal Government Department Head I Donald Abraham Lara, ug Administrative Assistant V Cristina Miranda.
Ang pagsuspenso sa mga nahisgutan nag-ugat sa mga motion for preventive suspension nga gisang-at sa mga nagreklamo nga sila si Jose Rene Moran ug Braulio Moran batok sa mga respondent sa kahadlok sa posibilidad nga usabon ang opisyal nga mga dokumento o maimpluwensyahan ang mga empleyado sa munisipyo kalabot sa mga kasong Grave Abuse of Authority, Grave Misconduct, Dishonesty, ug Conduct Prejudicial to the Best Interest of the Service niadtong Abril 23, 2025.
Ang kaso naggumikan sa unauthorized construction sa usa ka “sobra og presyo" nga bodega niadtong 2023.
Ang istraktura gitukod sa usa ka 4,000 metro kuwadrado nga lote nga adunay titulo nga gipanag-iya sa mga eredero sa nangamatay nga pamilyang Maria Zambrano.
Ang pagtukod nahitabo nga walay pagtugot sa mga tag-iya, ug Deed of Conveyance pabor sa munisipyo sa Dalaguete.
Wala sab kini prior expropriation case nga naglambigit sa lote kaniadto.
Tungod niini, si Ombudsman Samuel Martires, kinsa nakakaplag og igo nga basehan sa pagtugot sa motion sa mga nagreklamo, nipirma sa unom ka pahina nga preventive suspension order niadtong Hunyo 2, 2025.
Matod ni Martires nga suspensyon kinahanglang ipatuman sa labing daling panahon.
Niadtong Mayo 2, 2025, gisultihan sa nagreklamo ang mga reporter human sa pagsang-at sa ilang reklamo nga ang ilang mga lihok dili politikal ug walay politiko nga nagpaluyo kanila, sukwahi sa akusasyon sa mayor nga ang pagsang-at sa kaso nahitabo atol sa panahon sa eleksyon.
Dugang pa sa nagreklamo nga ang pagtukod sa giingong sobra og presyo nga bodega adunay aktuwal nga gibanabanang gastuhan nga kapin sa P3 milyon, apan niabot kini og P8 milyon.
Sa wala pa ang *midterm election* niadtong Mayo 12, si Cesante ug daghang opisyales nag-atubang og daghang mga reklamo gikan sa nagkalainlaing nagreklamo bahin sa giingong paglapas sa mga balaod batok sa korapsyon nga gisang-at sa National Bureau of Investigation sa Central Visayas ug sa mga nabalaka nga lungsoranon.
Si Cesante ug ang iyang mga kauban nga respondents giingong nagpatuman og iregular nga proyekto sa pag-ayo ug pagsemento sa dalan nga nagkantidad og P9.65 milyon subay sa ML Quezon St. sa Barangay Poblacion. / EHP