Wala’y na-knockout hinungdan nga wala’y gideklarar nga mananaog sa eight-round exhibition rematch nila ni Floyd Mayweather Jr. ug John Gotti III niadtong Dominggo, Agusto 25, 2024 (PH time) sa Arena Ciudad de Mexico sa Mexico City.
Sa usa ka exhibition, wala’y ideklarar nga mananaog gawas lang kon adunay ma-knockout.
Si Mayweather, kinsa niretiro isip professional boxer niadtong 2017 nga wala’y pilde sulod sa 50 ka mga away, nidominar sa away pagsugod sa 2nd round.
Adunay higayon nga moaksyon pag-agresibo si Gotti apan yano ra nga malikayan ni Mayweather ang iyang mga ataki.
Si Gotti, kinsa adunay 5-1 nga rekord sa mixed martial arts (MMA) una kini nibalhin sa boksing, wala na modepensa og insakto sa ulahing bahin nga maoy nakapungot sa kapin sa 22,000 ka mga tumatan-aw nga tataw nga nakuwangan og insaktong binukbokay.
Sa katapusang round, gi-corner ni Mayweather si Gotti apan nakahuman ra gihapon sa away ang apo sa bantugang New York crime boss, kinsa nipanaw na sa laing kalibutan.
Unang nagsangka sila si Mayweather ug Gotti niadtong Hunyo, 2023 sa South Florida, Miami. / ESL