HANGYUON ni Mandaue City Mayor Glenn Bercede ang Mandaue City College (MCC) nga ikonsiderar ang pagbukas og dugang slots gawas sa 150 nga nagahin na para sa mga senior high school graduates nga wala makapasar sa entrance examination.
Sa usa ka interbyu niadtong Lunes, Hunyo 23, 2025, niingon si Bercede nga mohimo siya sa maong hangyo kang MCC Administrator Joey Rivamonte tungod sa kadaghan sa mga estudyante nga nangita og tunghaan sa kolehiyo nga gipadagan sa siyudad.
Daghan sa mga estudyante karon nangita og endorsement gikan sa committee on education sa Konseho sa Siyudad human wala makapasar sa exam.
Ang hangyo ni Bercede magtumong sa pagsiguro nga daghang estudyante kutob sa mahimo ang makabenepisyo sa libreng edukasyon sa kolehiyo sa MCC.
“Mangayo mi ni Mr. Rivamonte kon puwedi ba madugangan pa ang slots para matabangan pa nato ang ubang estudyante nga gusto gyud moeskuyla. Daghan kaayo ang naglaom sa libreng edukasyon,” matod niya.
Ang kasamtangang gidagha-non sa mga tinun-an sa incoming freshmen anaa sa 700.
Agi og tubag sa planong hangyo, si Rivamonte sa usa ka buwag nga interbyu niingon nga ilang ilhon ug sundon ang mando sa mayor nga mao ang tsirman sa board.
“Dili kana problema. Ilhon namo ang hangyo kay ang mayor mao ang chairman sa board. Ang MCC ubos sa LGU, ug kami usa sa mga departamento niini. Mosunod ra mi ug maghuwat sa instruksyon sa mayor,” matod niya.
Namatikdan ni Rivamonte nga kinahanglan ang dugang nga logistics kon mosaka ang gidaghanon sa mga estudyante nga madawat.
“Ang amo lang hangyo nga mahatagan og dugang tawo, pasilidad, ug classroom para makahatag gihapon ta og maayong serbisyo sa mga estudyante,” dugang niya.
Sa dihang gipangutana bahin sa iyang mensahe ngadto sa mga estudyante ug ginikanan nga naglaom gihapon nga makasulod sa MCC bisan pa nga wala makapasar sa entrance exam, gipadayag ni Rivamonte ang pagsabot ug niingon nga ang katapusang desisyon anaa sa umaabot nga administrasyon.
“Nanghinaot mi nga ang umaabot nga mayor mo-aprobar sa hangyo, sanglit siya man ang bag-ong chairman sa board. Sila ang mo-aprobar, mopirma, ug mohatag og instruksyon. Kami, mosunod ra,” matod niya.
Ang hangyo ni Mayor Bercede gilauman nga mahimo sa dili pa matapos ang iyang termino, uban ni Mayor-elect Thadeo “Jonkie” Ouano nga molingkod sa katungdanan sa Hunyo 30, pila ka semana sa dili pa magsugod ang klase sa MCC sa Agusto. / Jeanette Arinque, HNU Intern